Chelle bote che ghievano a Formiello
Le gente, te parevano formiche,
Tutte ’n forma, co coppole, e ccappiello,
A ccavallo a le cchierchie, e co bessiche
Se devano co ttiempo a lo scartiello
Co chillo fruscio de stivale antiche;
Po co zampogne, e co le cciaramelle
Danzavano le becchie, e le citelle.
Mo che nce penzo a chill’antiche sfuorge
Rido co ll’uocchie, e chiagno chell’auanza;
Jive a la festa co li passagorge,
Co ccauze a brache nfi sopra la panza
Pareva ll’ommo comm’a no San Giorge,
Passanno chella notte sempe ’n danza;
Mo jammo sempe arreto comm’a grangio,
E penzo a chelle state, e mme n’arragio.
Io penzo a chelle state, e ben compiendola
Quann’era tanto bene, e tant’accummolo,
Co chillo juoco de la sanni-pendola,:
Ed a lo fossetiello co lo strummolo.
O vita nzuccarata comm’a mendola,
Lo tortano cchiù gruosso de no tummolo,
Lo lupo era comparo co la pecora,
E ll’ascio zio carnale co la lecora.
Da viecchie antiche aggio sentuto dicere,
Che treccalle valea na chiricoccola;
Avive pe seie grana, e non t’affricere,
Tridece polecine co la voccola.
Va accatta meza quatra mo de cicere
A ste ppoteche, e bide si se scoccola;
Do vino, ch’era fatto a Parmentiello
Valea no ncoronato a barreciello.
