La pizza te parea rota de carro,
Quant’a no piccor’era lo capone;
Àvive quanto vuoie senza caparro,
Va piglia mo ’n credenza no premmone:
Mo a mmalappena puoie accattare farro,
Che non t’assoccia adduosso lo jeppone;
Li cuofene de dattoli Arbanise
Comme a nnocelle de li Calavrise.
Tann’era a la marina Jacovella,
Che ammezzava a li cuorve da parlare,
Pe cinco grana avie na pecorella
Tre ffecatielle pe quatto denare:
Mo la carne de vacca, e de vitella
Te volle ’n canna, e no nne puoie accattare;
E ttanno puro a la taverna n’accio
Co no torneso avie, e no sanguinaccio.
Filavano a le cchianche ll’ossa maste,
Le nnateche, e llacierte de vitiello,
Na pennolata avive de pollaste,
De cchiù de sette pe no carreniello:
Pe ssaturà manipolo e chiù maste
Co no denaro avive no criviello
De verole monnate caude caude
Senza magagne, e ssenza nulla fraude.
Lo cefaro sautava frisco frisco
Da la della quanno lo friive;
De nnatte, de recotte, e ccaso frisco
Nc’era la grassa, e cchiù no nne volive.
Lo natatore te chiammava a ssisco
Pe ddarte le ppatelle vive vive;
Va nfi a la Preta mo, se non te ncresce,
Strill’a le ciaole, non puoie avè no pesce.
Doyp
Digitized by.Google
Dove
