II.
Jere, mente sentea no gran sciabbacco,
Io veo venì strillanno Cola Sicco:
Chi de la rrobba mia s’ è ffatto ricco
Nzegnamillo, pe Ddio, quanto lo sciacco.
Dapò arrobbato, mme vò mette ’n sacco,
Ca n’ è pe lo nteresso, è pe lo cricco.
Vi si mme lo scavasse, o Cienzo, o Mieco,
Dille ca nc’ è pe lloro lo ttabbacco.
Zitto, dich’ io, ca può passà pe llocco,
Se sa, ca no stà dinto a quà trabbucco
Chi arrobbaria la pesta a Santo Rocco.
Leva sse ghioje, e arma lo mazzucco,
Ca si a le ccorna no le daie no crocco,
Ll’ anno che bene te fa n’ autro trucco.
III.
Tu saie de Filosechia, e ssi politeco,
Sottile a ddespotare, anze bisbeteco
Cecròpo, e n’ argomento mparaliteco
Meglio faie tu d’ ogne Perepateteco.
Ma si mme vaie toccanno a lo ppoeteco,
Co lo quarto de l’ arte mme la liteco,
E a so punto nfra l’ autre io nce so areteco,
Ca non serve Poeta, quann’ è stiteco.
De chisse io mo n’ aggio cacciato vateche,
E agnuno è ghiuto sempe comm’ avesse
Magnato scurmo, e ccerasa majateche.
Tu si non magne a pasto autro che allesse
’N tutto te manno a revotà Grammateche,
E ’n trenta mise non farraie tre besse.
