Cecco. E io sore nun ne tengo....
Pul. E addu mammeta me ne vengo.
Flor. Ma la finisci si o no? Avanti.
Pul. Tutt’assieme è venuto na zingara.
Flor. Una azucena?
Pul. Gnernò nun nce steva Matalena.
Cecco. Il tuo padrone dice che era una maliarda.
Pul. Tu qua mallarda, chell’era na zingara.
Flor. Ho capito; era una che indovina.
Pul. Gnorsì, una ch’annevina.
Flor. Ebbene?
Pul. Embè mastu Francisco ha ditto vicino ’a zincara: Vulite anduvinà ’e tre figli miei? ’A zingara ha ditto ’e si. ’O primmo hadda essere acciso..
Flor. Povero padre!
Pul. O sicondo hadda i’ a murì ngalera pe mariuolo.
Flor. Povero padre!
Pul. ’O terzo hadda essere nu gran micidiante.
Flor. Povero padre! (Cecco ripete, piagnucoloso).
Pul. Vuie che ve facite afferrà?
Flor. Compiangiamo la sorte del padre.
Pul. Figurate... mastu Francisco ’a chiammato subbeto cunziglio, e de sti cchiù dotte, nisciuno ha saputo ricere niente. Io, ca nun faccio pe m’avantà songh’o cchiù ciuccio ’e stu paese, songo asciuto mmiezo e aggio ditto: Vulite scummettere nu litro ’e vino che sul’io songo buono ’e dà nu cunziglio a mastu Francisco? Tutte quante hanno ditto: scommettiamo. Allora io senza perdermo d’anema mi sono mettuto in quantunquio.
Flor. E tu sei stato buono a dar consigli così difficili?
Pul. Mo sentite. Aggio ditto, lassateme senti: ’o primmo ch’adda essere acciso? Embè fallo surdato, accussì chillo va nguerra, have na palla nfronte e more onoratamente per la patria.
Flor. Benissimo.
Pul. ’O sicondo ch’hadda essere mpiso pe mariuolo? Embè mparalo sarto, accussi chillo arrubbannose nu parmo ’e rrobba ’a nu cazone e nu parmo ’a coppa ’a giacchetta, suddisfa l’inclinazione e nun more cchiù mpiso.
Flor. Beh, beh, beh!.
Pul. ’O terzo...
Flor. Eh, il terzo è difficile.
Pul. Invece ’o terzo è cchiù facile.
Flor. E come?
