Checchina
(a Rafele) Signurì, p’ammore 'e Dio, vuie afforza vulite aizà a voce?..
Rafele
E sta cosa fosse fernuta ccà sarria niente, ma io sò certo, sò sicuro ca vuie duie, stanno nzieme a servì, sta vernia nun 'a fernite cchiù.
Checchina
Ma io ve giuro..
Michele
Ncopp’a vita ’e chella vicchiarella ’e mammema!
Rafele
No, no, è inutile che me facite sti giuramente!
Michele
(Ma è tuosto sà!.. Mò ’o rompo 'a faccia e me ne vaco..)
Rafele
E pò, Ciccillo già m’ha fatto capì che vò corta nova e specialmente ’e cammariere ’e vò piglià 'a l’alta Italia..
Michele
Pecche, nuie servimmo malamente, mò?.. tutto nzieme nun ghliammo niente cchiù?
Rafele
Nun è pe chesto.. ma saie, ’e cammariere ’e l’alta Italia in una famiglia che si rispetta, fanno un altro effetto. E poi è scicco, è molto psciat, come dice Sasà.
Michele
Insotnma, vò dì, ca già nce stà priparata 'a cartella sotto ’o piatto?
Checchina
(commossa) A me ’e niente me dispiace, ma è p’a signurina
