Checchina
(con dispetto). Neh, parleme chiaro. Che tiene a dì su cunto mio?
Michele
Vi cumme ’o saie fà e te riesce! (dopo guardato intorno). Piccerè, penza ’e nun fa cchiù jacuvelle c’ ’o signurino, e nun te fà pezzecà cchiù d’ ’o signore..
Checchina
(con rabbia). Siente, si nun stessemo ccà ncoppa te faciarria ’a faccia lenza lenza!
Michele
Tu a me?
Checchina
Si, io a tte!.. (riscaldandosi, ma sempre a voce bassa). Chesta è ’a gelosia che te fa nzurfà...
Michele
Io nun ’o saccio; putarrà essere... Ma penza ca ’o signurino fa animore cu na canzunettista, e ’o signore pur’isso tene n’ato mpicchio...
Cecchina
Ma scemone che sì! E’ ’a gelusia ca te fa vedè tutto cose nire... e ppò, te pare ca ’e signure se ne ponno ncarricà ’e me...
Michele
E pò, Checchina mia, che può sperà 'a lloro?
Checchina
Ma te pare... che io scengo da ’a muntagna?
Michele
(rincorato). Ah!.. mò veco ca tuorne a essere chella guagliona raggionevole che io aggio vuluto sempe bene... Checchenè, mò ca nun ce sta nisciuno... damme nu vasillo.
