Ermelinda.
Te ricuorde quanne venive a truvarce ’a dummeneca, ’o casino ncopp’a Arenella e cu ll'ati guagliune pazziavemo a vienitenne?!..
Adolfo.
(sorridendo tristamente) Comme, nun me ricordo!. Belli tiempe chilli Uà!..
Ciccio.
Ermelì; lass’ ’o j, chillo ave che ffà e nun pò penzà a sti sciucchezze..:
Ermelinda.
E che diavolo, doppo 5 mise 'e viaggio, doppo juto currenno e scavalcanno muntagne notte e gghiuorno, ave sempe che ffa! (ad Adolfo) Manco mò che sì turnato, te ripuose nu poco?
Adolfo.
Tutt’ 'e juorne se mangia, cara Ermelinda, e tutt’ ’e juorne s'adda faticà.
Ermelinda.
Tale e qquale a Sasà, che s’aiza all'una ’a dint’ ’o lietto!
Ciccio.
(punto) Sasà è n'ato fatto., ognuno nasce pe na cosa...
Ermelinda.
E Sasà pecchè è nato, pe che cosa?
Ciccio.
(contrariato) ’O rre è nato pe fà 'o rre, 'o signore pe fa 'o signore, 'o zappatore pe zappà 'a terra...
Ermelinda.
E Sasà è nato pe nun fa niente!
Ciccio.
(c. s.) Jamme, nun fa ’a scema!..
Adolfo.
(’O serpe nun 'o dà ncapo!) Zi Ciccì, io mme ne vaco...
