Chesta paggena è stata leggiuta.
54
'o funneco verde
II.
Ogne ghiuorno accussì, cummara mia.
e ogne sera, quann’essa se spugliava,
io lle faceva chesta letania
e a la Madonna l’arraccumannava.
"Mado’ tienela mente pe la via!
Dalle lume, Mado’!… " Nun me curcava
senza di’ groliapatre e avummaria
anfino a quanno nun se retirava.
"Addò si’ stata? " Primma rispunneva:
"Addò so’ stata? Ncopp’addò Nannina…
Addimannatecello… me vuleva…"
Po’ se cagnaie. Sapite na matina
che me dicette? Me dicette: — Oi ma’!
Faciteme fa’ chello c’aggia fa’!
