Chesta paggena è stata leggiuta.
57
'o funneco verde
V.
— Ll’avite vista cchiù? — Chi? Mariella?
Ve pare! Comme! Sere fa venette…
Cummara mia, s’è fatta accussì bella
c’a pprimma botta nun ’a canuscette.
Che sciucquaglie, cummà, c’oro, c’anella!
E c’addore purtava, e che merlette!…
I’ senteva na voce: "Mammarella!
Mammarella addò sta?…" Ntela e currette.
— Che dicette? — Sentite; dice: "Oi ma’!
Che ve ne pare de sta figlia vosta?…
Vuie comme state?… Embè!… Nun c’è che fa’…"
— Neh? (Ma ce vo’ na bella faccia tosta!)
— E mme purtaie nu taglio ’e satiné…
Trasite, ca v’’o voglio fa’ vede…
