Chesta paggena è stata leggiuta.
4
suniette antiche
II.
A ll’unnece lu vico s’è scetato
pe lu rummore ca fanno li suone;
da vascio, nu cucchiero affemmenato
se sta sbrucanno sotto a nu barcone.
Ncopp’a nu pandulino accumpagnato
isso s’ammullechea cu na canzone;
nzuocolo se ne va lu vicenato:
"Che bella voce, neh, che spressione!"
— Arapela, Nannì, sta fenestella!
Siente la santanotte, anema mia!
Salutame, Nannì, cu sta manella! —
E addereto a li llastre fa la spia,
cu ll’uocchie nire nire, Nanninella…
Ah! ca mo moro pe la gelusia!
