Chesta paggena è stata leggiuta.
104
poemetti del cuore
tu, ca vicino a Essa me vediste
tremmà, fissanno chelli ttrezze d’ oro
e a murmurà pure me surprenniste.
« Pecché nun moro? »;
tu, ca da ’o quatro addò pittata stive,
liggennome int' all’ uocchie addulurate,
lacreme ardente passïà vedive,
e scunzulate;
dincello tu, dincello tu, qua' bene,
qua' sentimento e quanta frenesia
m' esce d' 'o pietto e me dà freva a 'e vvene,
oi Santa mia!
Dincello tu, si 'a vita aggio passata
a suspirarla e a spantecarla bella,
quanno credevo d' 'a truvà ndurata
dint' a na stella!
Dincello tu, si chisto core afflitto
nun l' è vulato attuorno a tutte l' ore!
Si nun l' ha suspirate zitto zitto,
cose d' ammore!
