Chesta paggena è stata leggiuta.
109
poemetti del cuore
Mmiezo 'a stu nniro 'e st' albere,
p' 'o scuro 'e chisti site,
chi simmo? Addò s' avviano
sti cuorpe nuoste, aunite?
Sti vocche noste parlano?
Se strègneno, sti mmane?
E turnarrà, dimane,
stu core tuio, cu me?
Nun è na cosa fauza
cumm’ ’a stu cielo ’e sera?
Nun simmo doi fantàseme
sotto a na cappa nera?
Mmiezo a stu lutto ’e ll’ anema,
cu ’a freva dint’ ’e vvene,
nui nce vulimmo bane?
O fosse nu chi sa?!
Tremmo... Me sento scènnere
nu friddo dint' allo' ossa...
p' 'a strata sulitaria
veco na macchia rossa...
Po' veco ca me lassano
duj' uocchie e doi manelle...
Sento nu frullo 'e scelle...
Te veco scumparì...
