Paggena:Poesie napoletane - Ferdinando Russo.djvu/159

157

poemetti del cuore

Sarrà nu brutto suonno ’e frenesia,
sarrà pazzia d’ ’a vita mia malata,
sarrà peggio, signale d’ agunia,
quanno ’a luce pe n’ ombra s’ è appannata....
Io nun ’o ssaccio! Io tengo dint’ all’ uocchie
tutte li ffreve ca m’ ’e date tu,
e me sento spezzato int’ ’e ddenocchie,
e me cunzumo... e nun cumbino cchiù!

Tutta pe tte, sta Primmavera bella!
Pe tte, cchiù bella d’ essa e cchiù gentile!
Splennore ’e cielo, addore ’e nepetella,
’e meglio sciure ’e chisto mese ’Aprile.
Va, viene, ride, canta! Anema e core,
pe quanto cchiù se po’, fàlle gudè!
Spàssate sempe! E scòrdate st’ ammore
pe chi te vularrà cchiù bene e me!

Io sto ecà, nchiuso! E chesta casa pare
na tomba fredda, addò nu muorto gela!
Làssame sulo, e famme nfracetare,
senza nu sciore e senza na cannela!
E si siente nu strillo, int’ ’a nuttata,
ca se lusinga ’e farse cumpatì,
nun ce fa caso! È n’ anema dannata!
Tu scuordatillo, e tòrnate a durmì!