Chesta paggena nun è stata leggiuta.
ACQUA CHE SCORRE...
Acqua che scorre nun se po’ fermare,
comm' io fermà nun pozzo li suspire !
Core malato nun se po’ sanare,
core cuntento nun po’ cumpatire!
Pe quanto sape ’e sale l’ acqua ’e mare,
pe quant' è brutto ’o punto d’ ’o mmurire.
sti llàcreme accussì me sanno amare,
sti penziere accussì se fanno nire!
Comm’ a lu fluoco se cunzuma ’a cera,
accussì se cunzuma chisto core!
Comme spontano ’e stelle a primma sera,
accussì mpietto sponta lu dulore!
Quanno pe tutto ’o munno è primmavera,
pe mme fa friddo e lu calore more,
pe mme lu juorno è notte nera nera...
Addò si’ ghiuto ? Addò si’ ghiuto, Ammore?
