Paggena:Poesie napoletane - Ferdinando Russo.djvu/200

198

poemetti del cuore

M' 'o ffacetteno credere! Io, cecato,
me scurdai tutt' 'ammore e tutt' 'o bene
ca pe tant'anne tu m'avive dato,

e te perdette!... E tu, comm'a na santa,
nun rispunniste manco! Me guardave
cu l'uocchie arze, e tremmave tuttaquanta!

Ah! Pecchè nun diciste na parola?
Si me giurave ca nun era overo,
t'avria creduta! A te sola!... A te sola!

Pecchè, pecchè nun rispunniste niente?
E quann'io te mettette 'e mmane ncuollo
e fui nu vilo, scellaratamente,

pecchè nun te scustaste e nun chiagniste?
Si cacciave una lacrema, una sola,
anema e core, nterra, avrisse viste!

Si facive una mossa, una sultanto,
'o sangue 'a ll'uocchie me sarrìa passato,
e me sarrìa spuntato 'o meglio chianto!

Ma tu me suppurtaste senza sciato,
senza strillà, senza jettà suspire...
E fuie pe chesto, ch'io restai ngannato!