Paggena:Poesie napoletane - Ferdinando Russo.djvu/208

206

poemetti del cuore

Cuglienno frutte, scarpesanno sciure,
sceppanno 'a terra 'e ggiglie mprufumate,
vi' che m'ha fatto? E, nun cuntenta, pure
'e fierre d' 'o canciello ha sturzellate!

E so' stato io, ca mò ve sto parlanno,
io, so' stato, a pregà p' 'a fa trasì!
Na vota dinto, e tuttuquante 'o ssanno,
me ntussecai, ma nun vulette ascì!

Che ssito ch'era chisto! All'otto, 'o sole
s'appresentava comm'a nu Rignante!
Io, stiso mmiez'a schiusa d' 'e viole,
era 'o cchiù felice ommo 'e tuttuquante!

Ccà palummelle e luce-luce d'oro,
ccà rusignuole, passere e zenzelle...
Che mmusica d'ammore! Era nu coro,
na nonna-nonna 'e tutt' 'e cose belle!

E quanno 'a sera accumpareva 'a luna,
guardànnome, cu l'uocchie d' 'a bbonora,
chisto pareva ll'Uorto d' 'a Furtuna,
'o ciardino d' 'a Fata ncantatora!