Chesta paggena è stata leggiuta.
214
poemetti del cuore
L'amicizia ched'è? Na mela fràceta
ca sulo 'a fore è fresca e culurata!
N'aniello 'e chiummo cu na preta fauza!
Na freva 'e curtellata!
E l'ammore ched'è? Date a na femmena
'o core vuosto, 'o sango, 'a vita e tutto,
chella, pe nfamità, senza na làcrema,
ve vo' vedè distrutto!
Aràpeme sti bracce! A lloro tornano
tutt' 'e penziere miei, Mamma mia bella!
Cu 'o raggio 'e l'uocchio, mamma mia, tu guàrdame,
chiaro comm'a na stella.
Vàsame nfaccia! E nun te piglià collera!
Mo' so' turnato a te, mo' so' felice!
'A gente parla? E falla parlà a schiòvere!
Chello che dice dice!
Quanno me guarde cu chill'uocchie d'angelo,
e si' cuntenta 'e me tenè vicino,
che me ne mporta si p' 'o munno diceno
ca songo n'assassino?
