Chesta paggena è stata leggiuta.
20
Appriesso: uno, pareva nu signore,
cu nu brillante 'o rito ¹) e 'a caramella;
e c"o tubbo nu poco a quarantore,
se ciancïava cu na piccerella.
Chisto... venneva. Era nu vennetore...
Era 'o basista ²) E chesta bammenella ³)
nun era certo na nenna d'annore,
o mmaretata o vèrula o zetella.
Tutt'e ddui s' 'a fumavano. E vicino,
na streca, nera comm'a nu tezzone,
deva nu vaso ⁴) a nu peretto 'e vino;
e appriesso a chesta, n'ommo, ca mparava,
cu nu bastone mmano, a nu guaglione,
menacciannolo, comme s'arrubbava.
