Chesta paggena è stata leggiuta.
- 27
—Nennè... nennè... fermateva... sentite...
—Neh, jatevenne!... ¹) Nun me ncuietate!
—Oh! che parola è chesta!... 'A do' venite?...
—Che ve mporta?! Pecchè m'addimannate?
—Ecco... Ma nu mumente, nun fuite!...
—Io vaco 'e pressa!... Uffà!... Nun me seccate!...
—Che core 'e cane ca mpietto tenite!
Se ve dico che v'amo... —Repassate... ²)
—Io ve repasso!... Ma vuie che dicite!...
—'A verità!... Tutt'accussì, vuj'ate!
Ve vulisse spassà, perciò 'o facite...
—Parola, ncopp'a chesto ve 'ngannate!...
Io faccio overamente, che credite?!...
—E valla a fa cu ssòreta ³), 'a penzata!
