Chesta paggena è stata leggiuta.
—Acciaccusielle! Picciuttielle 'e sgarra, ¹)
vuie ca purtate 'o cappelluccio 'a sgherra,
na mazza 'n mano ca pare na varra
e si sputate vene 'o serra-serra,
e si guardate, sta guardata sguarra
comm' a na lama int''a panza, o pe terra
fa scunucchià la gente pe caparra,
mo' scemïate ²) pe nun jire 'a guerra!
A vvuie acciaccusielle picciuttielle!
Chi tene core se facesse nnaza!
Jammo! Quann''e cacciate sti curtielle?!
Na zumpatella ³) sola!... Pe ccrianza!...
E ch'è!... Facite 'e surde...? 'e stunatielle?
Ve tremmano 'e stentine rint''a panza!
