Chesta paggena è stata leggiuta.
—Mammà! Nu poco 'e pane...—Figlia mia!
Te l'aggio ditto ca nun ce ne sta!
Giesù, Giesù, sta povera Sufia
me fa spartere ll'anema!...—Mammà!...
—Aspetta figlia!... Guarda mmiez''a via,
ca chesta è ll'ora solita è papà...
Miettence 'a mana, Vergena Maria!
Nun saccio propio cchiù comm'aggia fa!
Giesù, Giesù, che vita disperata!
Fosse sulo pe me, nun mpurtarria!
Ma è pe sta piccerella sbenturata!
Nun chiagnere, nennè, bell''e mammà!
Nun chiagnere, si no cade malata...
Nu muorzo 'e pane... e nun ce 'o pozzo dà!
