Chesta paggena è stata leggiuta.
58
sunettiata
CORE 'E CANE...
— E songo, st' uocchie miei na funtanella
cu nu zampillo 'e lacreme d'ammore.
Io m' era miso cu na brunettella
ca ditto 'n fatto s'arrubbaie stu core.
Mo s' è spezzata chella catenella,
dint' 'o bicchiere s' è seccato 'o sciore!
Mo s' è scurdata 'e me chella mpesella:
core 'e femmena è core ngannatore!
Quanto vurria sapè c'ha guaragnato
sta piccerella a farme stu dispietto...!
Io steva ncielo, e nterra m'ha menato.
Io steva 'o llustro e m' ha rummaso 'o scuro;
e vaco mo, senza truvà arricietto,
comm' a nu cane spierzo, muro muro...
