E pàssano accussì, dint' a sti cunte,
Fate e palomme. E 'o piccerillo 'e vvede...
« Suonno suonno ca viene da li munte,
« viene a cavallo e nun venire a piede... »
Senza stancarse maie, 'a mamma canta:
« Vienice, suonno ca nun vuò venì!... »
E a poco a poco, cu 'a capa pesanta,
'o piccerillo se torna a addurmì...
Accussì, mmiezo 'a vita 'e tutte ll' ore,
mmiezo 'a tempesta e 'o nniro d' 'a nuttata,
faccio pur 'io na faccia appaurata
e guardo attuorno cu n' appietto 'e core...
E penzo: Tuttecosa è na pazzia!
Pure 'o cunto d' 'e ffate è na parola...!
Ogne uocchio ca te guarda è na buscia!
Stai mmiezo 'a gente, e l' anema sta sola...
Ma si nu juorno, caso mai, nu raggio
te schiara 'a vista 'e chello che buò tu?...
Embè, tanno chist' uocchie nchiudarraggio
c' 'o desiderio 'e non me scetà cchiù!...
