Si no, stu sole, ca passanno 'a ll’ albere
trase p’ ’e llastre e arriva nfaccia a te,
perde ogne luce, e ’a fede me fa perdere
ca pe tant’anne ha sostenuto a me!
Io te vedevo cu ’o penziero 'e ll’anema,
e te sunnava comm’ a nu gulio...
Bella e lucente! E st’ uocchie chine ’e làcreme
erano 'o quatro ’e chisto core mio!
Mo’ tu me vase. L’ uocchie tuoi me parlano,
‘o sole luce... E tutte li mmatine
te vasa nfronte quanno te se mbrògliano
'e ricciulille tuoi, ncopp' 'e cuscine...
Io parlo... parlo. E tu me dice: Parlame!
E t' arruobbe 'e pparole ca te dio...
E 'o sole, ca pazzèa pe dint' 'a cammera,
nce vene a salutà, comm' a n' amico...
Che luce, core mio, dint' a chest' anema!
Che sentimento ca nun murarrà!...
Sora mia bella, a chisto core appoiate!
Sunnammo 'o suonno d' 'a felicità!
