Chesta paggena è stata leggiuta.
83
poemetti del cuore
L’ ORA D’ ’O SOLE
Comm' 'e tre Magge vanno appriesso ’a stella,
vèneno appriesso a te, (me pare ajere!)
‘o sentimento, ’o core e ’o penziere!
Passa n’ at’ anno! E tu te fai cchiù bella!
Nasce ’o Bammino. E nasce int’ a stu core
n’ ata speranza: chella ca tu sai!
Sciore ’e l' ammore mio ca mai nun more,
fuoco c’ avvampa, e nun se stuta mai!
Guarda stu cielo! Stammatina l' aria
pare c'ha dato appuntamento a 'o sole
pe se fa dì chi sa qua' cose tennere!
Pe lle scippà va trova qua' parole!
E 'o sole pare ca le vò risponnere
tre parulelle, belle tutt' 'e tre:
« Te voglio bene! » Sciure 'e dint' all' anema,
dette comm'io t' 'e sto dicenno a te!
