Chesta paggena è stata leggiuta.
89
poemetti del cuore
SOTT' 'O BALCONE...
So venute a sunà cierti cecate
sott' 'o balcone addò t' aspetto a te.
Tutt' 'e ccanzone meie t'hanno cantate,
ma nun ce stive. Ire luntana 'a me.
Luntana assai, ma chesta vota overo,
senza speranza manco 'e nu chi sa!
Luntana 'e core, luntana 'e penziero,
luntana 'e sentimento e de buntà.
E pure ' o juorno primma eramo state
stritte, vicine: t' 'o rricuorde, o no?
E me dicive cose appassiunate
ca chisto core mio scurdà nun po'!
E pure 'o juorno primma eramo jute
nzieme 'ncampagna! T' 'o rricuorde, o che?
E mmiezo 'e vase nc'eramo perdute;
e tu addurave comm' 'a nu buchè!
