Tutto è passato! Primmavera bella,
quanno venive e me dicive si';
quanno m’ accarezzave cu ’a manella
e me parlave comme vulev’ i’!
Tutto è scumparzo, tutto s’è squagliato,
tutto è distrutto; e stranio mo te so’,
comm’ a na fronna secca addeventato
ca nun se ferma mai pecché nun po’!
E tu si’ ’o viento, ca se nfuria e passa
senza sapè qua’ male po’ purtà,
e sbatte, e spezza, e spàstena, e scunquassa
putenno 'a vita 'e n’ommo arruvinà!
Chesto m'attocca! Quanno tu 'e sentuto
ca 'o core tuio nun le 'mpurtava 'e me,
'e miso 'o muorto dint'a nu tavuto,
l' 'e ditt' 'o requie, e cchiù n' 'o vuò vedè!
E nun 'o ssai ca pazzo e avvelenato,
mmiezo 'e ccanzone ca sentive tu,
mo' pur'io canto comm'a nu cecato
pecchè te sonno e nun te veco cchiù!...
