cchesto, io nun ascesse… Ma cu stu piccerillo malato… Aspè!… diciotto solde…
Rachele — Sa pecchè…. mo’ vene ’o lattaro… Porta ’o miezo litro ’e latte p’’o piccerillo… L’aggio a pavà pure chillo d’aiere…
Rafele — Sciorta! Sciorta! Chell’anema ’e Dio malata ’e chella manera… e io c’aggio a ji’ a ’o triato!… (Amaramente, sordamente). Pulecenè, fa ridere! E comme pozzo fa’ ridere, s’io vulesse chiagnere!… Chiagnere a tanto ’e lacreme!… (È commosso)
Rachele — Embè… mo’ faie scetà a chillo criaturo! E nun avè a paura… ’O Signore nce aiuta!
Rafele — (Rassegnato, avviandosi verso l’attaccapanni) Me’… jammo a fa’ diverti ’a gente! «Pulecenella ca s’arritira mbriaco e Culumbrina ca o vatte!» E ’a gente ha dda sbattere ’e mmane… E redimmo… redimmo… redimmo!…. (Ha le lacrime agli occhi. La moglie lo segue. Egli è andato all’attaccapanni, vi ha tolto la giacca, che ha indossato. Mette in capo il cappello a cencio. Sospende la giacca sdrucita, che aveva prima addosso. Adesso mette in un involto il camiciotto bianco del Pulcinella, la mezza maschera nera, e il berretto a cono bianco, che erano su una sedia in fondo) E ghiammo… (Abbraccia la moglie. Piano a lei): T’arraccumanno a Giacumino mio… Pienze ca io sto’ llà abbascio e sto ccà cu tutto me stesso!… Rachè.. (Depone l’involto su una sedia). Si io nun ce jesse?… Si manno a dicere ca sto’ malato?… Rachele — Fa comme vuò tu… Ma po’… comme facimmo? (Gli mostra il piccino) Nun te danno ’o spesato… E nuie nun tenimmo che nce mpignà cchiù… E ’a misturella po piccerillo… e ’o latte?…
Rafele — (Con rassegnazione) E allora vaco… Ma torno ampressa… (Le fa cenno di restare presso l’uscio. Va in punta di piedi presso il lettuccio del figlio. Fa segno che s’è appisolato. Lo guarda con amore. Manda un bacio sulle punta delle dita al piccino dormente; poi, in punta di piedi sempre, sta per guadagnare l’uscio).
