Ans. (Io non ho capito niente ancora).
Mat. Ah! cu nun ne pozzo cchiù!.. figlia, figlia mia!..
Ros. Che! vuie site?
Mat. Si. io songo chillu militare ca te lassaie mputere a chella femmena chiaunnata ’a siè Rachela. Io songo chillo ca p’ ’o spazio e 18 anne aggio chiagnuto sempe... io songo chillo che lassaie stu portafoglio a chella femmena... Ah! viene, viene dinto 'e braccia ’e pateto... (si abbracciano)
Ros. Ah! cielo mio, te ringrazio!..
Ans. Quale felicità!... — Pul. Quale disavventura!..
Scena ultima — Tutti
Cat. Signò, io vengo... che beco!..
Ros. Catarì, ’o cielo s’è arricordato ’e me, pecchè aggio truvato a patemo. — Cat. Comme? comme?
Mat. Sì. io sono suo padre.
Cuo. Gio. ’O pate!
Ros. Ah! Pulicenella mio, mo songo cchiù cuntenta.
Pul. Sine, mugliera mia.
Mat. Figlia mia. da oggi in poi, tu e tuo marito sarrate ’e patrune ’e tutt’ 'a roba mia.
Ros. Pul. E nuie ve ringraziammo.
Gio. Catarì, e vuie vulimmo cumbinà ’o matremmonio nuosto cu chillo ’e Rusina e Pulicenella dint’a nu stesso juorno. — Cat. Proprio accussì.
Mat. Basta, ora vogliamo andare tutti in giardino e festeggiare questa bella giornata.
Ans. E dice bene D. Matteo.
Cuo. Oh! mo pare ca simme tutte quante cuntente!
Pul. Cioè... tutte no... — Cuo. E pecchè no?
Pul. Pecchè nun sapimmo si a sti signure l’è piaciuta sta cummedia.
Cuo. Haie ragione, pecchè senza ’o cuuzenzo lloro... tu che ne cacce?
Pul. (al pubblico) Pubblico rispettabile, a vuie... sino nun ne cacciammo propeto niente nuie.
