Cat. Aveva ì nu momento fino d’ ’a cummara. Ma, Giuvà, dimme na cosa: tu da quacche tiempo pare cumme si te fusaci scurdato ’e Catarina tuia.
Gio. Io scurdarme ’e te? io? tu..
Cat. Io, tu... ma che d’ è stu parlà mazzecato? parlame chiaro, io nun capisco...
Gio. Ma che buò capì? Hià capì sulamente ca te voglio bene e niente cchiù.
Cat. Sì, nce pare, bello bene! poco e niente te faie a vede cchiù ’a chiesti vie...
Gio. Ma che buò ’a me? si io cammino notte e ghiuorno cu sta cascetta appriesso, e nun me pozzo arrivà a sfamà manco ’e pane asciutto.
Cat. E allora vò dicere c’ ’o matremmonio nuosto nun ce pienze cchiù?
Gio. Io quann’ aggio dato na. parola ’a sostengo sempe. E nun ce penzà c’appena me so’ accunciato nu poco cu ’e fatte mieie, spusarammo.
Pul. (2 11 38: terno sicco.)
Cat. Giovanniello mio, quanto te voglio bene!
Gio. E anze ce sta na certa prubabilità ca ’a prummessa mia ’a mantenarraggio primma d’ ’o tiempo...
Cat. E comme?
Pul. (2 21 38: terno sicco.)
Gio. Pe mo nun te pozzo dicere niente ancora. Basta, io me ne vaco, statte bona. Cumpà, jammuncenne.
Cat. E me lasse accussì?
Gio. T’aggio ditte ca pe mo nun te pozzo dicere niente ancora. ’A vì llanno ’a vì, ampressa ampressa aveva rotto ’e ccarrafelle, nun se credeva ca io ’a parola mia nun ’a cagno manco c’ ’o primm’ommo d’ ’a terra. Va, io me ne vaco, statte bona, sciasciona, papposa, butirrosa mia nce vedimmo stasera, (via)
Cai. Embè, io nun capisco...
Pul. E già, chillo have ragione pecchè io, pecche vuie... 2 21 38 terno sicco. (via appresso).
Cat. E pure io sarria desiderosa ’e sapè qua è sta prubalità ’e spusà cchiù ampressa. Ah! ca si sponta stu juorno io me pozzo chiammà ’a femmena cchiù felice ’e sta terra.
