Cuo. Scarpe e scarpini. Stong’ alluccanno ’a stammatina e nun aggio pututo vennere ancora nu paro ’e scarpine. Mannaggia ’a sciorta mia, mannaggia!.. Seh, e ca io po’ me dispero, che ne caccio?
Cat. (’O pate ’e Giuvanniello.) Papà, buon giorno.
Cuo. Buongiorno, Catarì, che se dice?
Cat. E che s’ha da dicere? v’aggi a dicere sulamente c’ ’o figlio vuosto Giuvanniello nun me tratta cchiù cumm’ a na vota.
Cuo. Catarì, tu cumme parle?
Cat. Parlo cumm’ a uno c’ ’o vo bene.
Cuo. Ma pecchè, c’ha cagnato penziero? Iammo, dimme ’a verità, ca pe quant’ è certa ’a jurnata ch’è ogge, m’ ’o voglio mettere sotto e... seh, e po’ che ne caccio?
Cat. Nonsignore, niente ’e tutto chiesto; ma sulamente... che saccio... nun se fa vede cchiù tanto spisso cumm’ a na vota... na sera vene, n’ ata no...
Cuo. Oh! chiesto po nu sta bene! Ma nun ce penzà ca quanno se retira stasera, l’aggia fa nu liscio e busso proprio nummero uno, pecchè isso... seh, e po’ che ne caccio?
Cat. V’arraccumanno mo, vedite d’ ’o fa capace, nun vularria ca isso penzasse a quacchedun’ata...
Cuo. Pe chiesto po’ nun dubità. Ma nun ce penzà ca isso o vò o nun vò a te s’ha da spusà.
Cat. E io ve ringrazio tanto tanto. Basta, io vaco fino a d’ ’a cummara ’e rimpetto. Dateme licenza (via)
Cuo. Povera figliola, me fa proprio cumpassione! comme! chillo birbante tene ’o curaggio ’e fa tutto chesto? oh ma quanno ’o veco stasera piglio ’o bastone, e... seh, e po’ che ne caccio? Basta, lassame j a vede si pozzo vennere sti canchere ’e scarpe, pecchè ogge fa acqua a’ pippa. (via)
VI. Rosella, poi Caterina
Ros. Bene mio, so’ ghiuto a d’ ’a signora a purtarle è doie matasse ’e felato e nun ce steva. Cumme faccio mo cu chiella cancara nera d’ ’a siè Giuvannella c’avanza doie rotole ’e pane? Ah, sciorta nfama! e
