Donna Carmela
Pruibìveve a figlìemo ’e veni a’ casa vosta. Se sape, ca stanno sempe azzeccate…
Si’ Francisco
Eh! quanno duie se vonno bene… (sorride incredulo, alza le spalle come per dire: è inutile).
Donna Carmela
(scattando inviperita) Che bene e bene! Site state vuie, c’avite truvato ’o muorzo sapurito, e v’ ’o site fatto cu ’a vocca.
Si’ Francisco
(con un grido) No, nun è overo!!!
Donna Carmela
Aîte aparato ’o mastrillo, e chillu chiòchiero nc’è caduto!
Si’ Francisco
Nun è overo! Chesto nun ll’hê ’a dicere!… Nun t’ ’o permetto! Nisciuno… Manco Dio!!! (la sua anima si solleva in un moto di ripugnanza e di fierezza) E putarrìsse credere na cosa ’e chesta?! Mme faciarrìsse capace ’e na cosa ’e chesta… accusi ’nfame!?… (inorridito) Cu Margheretella mia!
