Chesta paggena è stata leggiuta du' vote e mo è fernuta.
Turillo. — Tant'onore putèssemo ricevere!
Ardichella. — Dimme nu poco, overo: quann'è? quann'è?
Turillo. — Quanno vo' Dio, e... quanno vo' papà. (E accenna con la mano a Majetta).
Ardichella. — Quanno vo' papà? Embè, a chi s'aspetta? (A Majetta:) Sa', Giacì: vuttammo e' mmane, pecchè... mme spiego?...è l'aria ca 'o mmena! (E ride:) Ah ah ah!
Majetta (ansioso e trepidante:) — Dunque?... Cavaliè?...
Ardichella (con una strizzatina d'occhi gli fa intendere che vuol parlargli da solo).
Majetta. — Nanè, tu e Turillo iate ncoppa 'o mezzanino a verificà 'o cunto d''a manifattura.
Turillo — (comprende. Subito, depone la scarpina sul deschetto, si alza, si avvolge il grembiule nei fianchi, e si avvia sveltamente verso il vano del fondo). — Cavaliè, ce date 'o permesso?
Nanella (si alza anch'ella, e si avvia verso il vano). — Permettete, cavaliè?
Ardichella. — Fate. Fate. E buon lavoro!
Ardichella (scherzoso:) — Neh, Giacì, stammo sicure?
Majetta (con tutta l'anima, sforzandosi di sorridere un po':) — Manco si fosse io stesso! Chillo guaglione è comme si mme fosse figlio!
Ardichella (serio:) — Capisco. Io pazzeo.
Majetta (avidamente, come sospeso tra la speranza e il timore:) — E... dunque?... Signurì?...
Ardichella (rannuvolandosi e sbuffando:) — Bubbaaah!... Caro Giacinto,... bisogna rassegnarsi...
Majetta. — Cavaliè?!
Ardichella. — Là, nun s'è potuto cumbinà niente!
Majetta. — Niente?!
