Chesta paggena nun è stata leggiuta.
(Carmela guarda il giovine, con occhi di stupore).
Ninuccio. — E stu penziero mme murtifica, 'a verità. Si mme so' cumpurtato accussì, è stato pe ve fa' capì ca simme a duie a chiagnere 'e peccate ca nun avimmo fatte, e pe ve dà a rentènnere ca si vuie ve rassignate a fa' 'o priatorio vuosto 'n terra, io pure so' sulo, ma nun mme saccio rassignà!
Ninucio. — E chesto è tutto. (Appare commosso. Dopo un breve silenzio:) Ve lasso 'a bona nuttata. (Si avvia, per uscire).
Carmela (instintivamente:) — Ninù...
Ninuccio (si arresta, si volge a lei, simulando indifferenza e scontento:) — Mm'avite chiammato?
Carmela (quasi pentita di averlo richiamato, appare indecisa:) — Sentite... Ve site... pigliato collera?
Ninuccio (senza muoversi, spallucciando e guardandola appena:) — ... E pecchè?
Carmela (dolcemente implorante:) — Nun mme dicite niente... Aggio ragione...
Ninuccio. — E chi ve dice 'o ccuntrario?
Carmela. — E vuie sulo mme putite cumpatì.
Ninuccio. — Cumpatì?! (Accostandosi rapidamente a lei e parlandole, con foga, quasi all'orecchio:) Ma io vularria tènere 'a forza e scetà st'ommo addurmuto, e lle fa' riacquistà e senze pe lle di': «È nu peccato murtale chello che faie. Sùsete. Muglièreta t'aspetta. E muglièreta è figliola!» (Una pausa breve). Ma... st'ommo dorme, e nun mme sente. E io nun songo 'o Pateterno: e miràcole nun ne pozzo fa'!
