Carmela
Neh, e chi se vede doppo tanto tiempo!? ’On Gennaro! Ah, over’è ca muntagne e muntagne e pure s’affronteno! (a Maddalena) Matalè, vasa ’a mano a don Gennaro....
Don Gennaro
(accarezzando la bambina)
Chesta è ’a piccerella...
Carmela
Chest’è Matalena. Comme?! Nu v’allicurdate ch’è nata mmano a buie?! Vuie venisteve pure ’o battesemo!
Don Gennaro
E mo quanto tene?
Carmela
Eh! Mo è trasuta int’ ’e cinch’anne... Che? Vì comme passeno ll’anne, ’on Gennà! Mme pare a jere! Ve ricurdate ’a puteca abbascio ’a Loggia ’e Genuva?... (agl’impiegati, traendo a sè una seggiola) Neh, premmettete?... (siede).
Don Gennaro
Comme, nun m’ ’a ricordo? (siede anche lui) E don Vicienzo ’o cafettiere? Che fa? Tene sempe chella vocca scustumata comm’a primma?
