Don Gaetano
Don Gennà, na cosa ’e juorno c’aggia mannà ’e ccarte a ll’Intendenza! (Beve).
Don Gennaro
Nun dubbitate. Basta, comme v’aggia di’?... Stu guaglione ca sta nzerrato cca dinto è figlio ’e sta Carmela e...
Don Gaetano
E dell’operaio dell’Arsenale. Questo l’ho capito perfettamente. Quindi (forbendosi la bocca) Carmela sposa un altro, procrea una bambina, che sarebbe questa Maddalena e... mbè?... E perchè nzerra ’o guaglione ccà dinto? (a Carmela) Nun t’ ’o putive tené?...
Carmela
Comme! Signurì! Nun m’ ’o vuleva tené!... E ve pae a vuie ca na mamma se vo’ levà nu figlio carnale ’a sotto ’o sciato suio? Embè... Pe forza accussì avette fa!... Nun fuie io, signore mio, nun fuie io!...
Don Gaetano
No? (prende tabacco)
Carmela
(accostando la seggiola e voltandosi per vedere dov’è la ragazza, la quale continua a stare presso gl’impiegati)
Matalè, state lloco... Pazzea, bell’ ’e mamma.
