Ovè?... Figlieto!? Embè, comme te pare, mme vuo’ fa fa afforze ’a parte d’ ’o scemo?» — No, Vicie’, bell’ ’e Carmela: ma io addò nn’ ’o manno a nu piccerillo ’e sirece mise? — «Ncopp’a chesto» — dicette Vicienzo — «ce penzo sempe io! Tu saie ’a cummara ’e sorema Nunziata? Embè, chella ’o Signore nun ’a beneretta e nun l’ha fatto fa figlie. È na femmena revulata e affezziunata: ’o guaglione ’o damme a essa. Essa s’ ’o tene, s’ ’o cresce, e tu può sta sicura comme si stesse int’ ’a casa ’e nu signore». — E siente! E penzece buono! E che fastidio te po’ ddà n’anema nnucente? — Niente! Niente! Accussì s’era miso ncapo e accussì vulette fa!... (resta silenziosa per un poco, e medita, commossa). Ah! Ca si mme ll’avesse pututo mmagginà nun mm’ ’o spusavo! Mme rummanevo accussì, risgrazziata cumm’era!... Ce ne stanno tante!...
Don Gennaro
(dopo un silenzio)
Embè, te dico a te, ca stu fatto overamente mme dispiace! (a Don Gaetano) Cavalie’, vuie sentite?
Don Gaetano
(scotendo la testa)
Eh!... Povera umanità!
Carmela
(seguitando interrottamente a narrare)
Basta... Se cumbinaie c’ ’a dummeneca appriesso, ’a cummara ’e Nunziata... s’ ’o veneva a piglià...
