(pausa) ’O sabbato a sera... Vicienzo era rummaso a faticà fino a tarde e io stevo sola e nun m’era fidata ’assaggià manco nu surzo d’acqua... (pausa) ’O guaglione... durmeva int’ ’a cònnela... (commossa, trattiene le lagrime) Io mm’accustaie... mm’ ’o vasaie chiano chiano, pe nun ’o scetà... Lle pigliaie chella manella ca teneva ’a fora ’a cònnela... e ’a vasaie... (singhiozza) E lle dicette: Peppenié!... Peppeniello mio... Aggiu pacienza!.. Perdoname!...
(S'asciuga gli occhi al grembiale).
Don Gaetano
(sospirando profondamente)
Ah! Signó!... E mo comme sta ccà dinto?
Carmela
Pecchè sta cummara ’e Nunziata, salute a buie ’o Signore s’ ’a chiammaie... (alla bambina, che torna) Matalè, statte ccà mo’.
Don Gaetano
Be’?...
Carmela
E siccomme io stongo int’ ’e ccase ’e nu ngigniere ca canusceva ’a bunettanema ’e patemo e sape tutte ’e guaie mieie, mme dicette stu ngigniere: Vuo’ fa na cosa? Io mo nne parlo ’o cugnato d’ ’o cuvernatore, ch’è amico mio, e facimmo trasì figlieto int’ ’o Ricrusò.
