Sav. Sì, ma fino a quando mammeta nun arriva, nun ce mettere ’o pede dinta casa mia, sinò piglio nu bastone e ve rompo l’ossa a tutte duie.
Nann. Caro zi zio, ncopp’a chesto ve dico ca si papà quanno murette m’affidaie a vuie e ve cunzignaie ’a dota mia, nun ve dicette ca vuie m’aviveva proibì di maritarmi. Dunque io ve dico ca me voglio mmaretà e ca nun voglio sta cchiù sotto la vostra schiavitù! nce simmo capite? pirciò penzatece buono a chello ca facite. (via)
Sav. E quanno maie nepotema ha parlato accussì?.. ma la colpa è tutta tua…
Fel. Ma vedite…
Sav. Nun ce sta che vedè; e sa che t’avverto? nun te piglià cchiù l’ardire ’e mettere ’o pede dint’’a casa mia si nun me puorte a mammeta, la mia futura sposa, e giuro a Bacco ca si te trovo n’ata vota ccà, te faccio fa nu zumpo da coppa ’a fenesta abbascio…
Fel. Ma vedete, io…
Sav. Nun ce sta da che vedè! T’aggio ditto puorteme a mammeta, famme dì da essa ca me vò bene e ca me vò spusà e io te faccio spusà a mia nipote.
Fel. Ma…
Sav. Puorteme a mammeta, puorteme a mammeta, puorteme a mammeta! (via).
Fel. Ma vedete che vecchio ostinato!.. Ma io tanto aggia fa che debbo conquistare il cuore di Nannina mia. Mo m’annasconno ’int’a sta stanza e quanno Nannina sta sola, uscirò. (entra a sinistra).
SCENA II. — Gulietta e Pulcinella poi D. Saverio
Giul. Bello gió, lassateme in pace, sinò me metto alluccà e chiammo gente.
Pul. Niente, niente nun te lasso; persuadete na vota pe sempe ca tu haie da essere ’a mugliera mia, oppure mi farai commettere nu suiciccio…
