Pul. Che me rispunne, cara carella, carogna?
Giul. Quanto site maliziuso!
Pul. E tu quanto sì mariola!
Giul. Vuiè site graziusiello.
Pul. E tu sì traseticcia cchiù ’e na suglia, che dice me vuò bene?
Giul. Pe mo basta! Chi sa… sperate, arrivederci.
Pul. Embé me lasse accussì: nè vidovo, nè zitiello, nè nzurato…
Giul. A n’ato ppoco nce vedimmo.
Pul. Quaglia mia settembrina.
Giul. Nasillo ’e pappavallo. (lazzi)
Sav. (d. d.) Gaetano, Gaetano…
Giul. Uh! sta venenno D. Saverio cbillo signore co quale aggia parlà, pe ccarità, nun ve facite vedè aspettateme abbascio.
Pul. No, io nun te lasso.
Giul. Pe ccarità, jatevenne (lo spinge per la comune e vianio entrambi).
Sav. (fuori) Gaetano, Gaetano, addò sarrà juto stu stupedo ’e servitore, pure chist’ato nce vuleva dinta casa mia pe me fa fernì ‘e perdere ’a capa… Gaetano… Gaetano…
SCENA III. — Nannina, poi Felice indi Giulietta
Nann. Zi zi, vuie che chiammate a Gaetano?
Sav. I’ stongo alluccanno ’a tre ore, chesto che cos’è?
Nann. Chillo nun ce sta.
Sav. Comme! nun ce sta?
Nann. Sì, ’o puveriello nun se senteva buono o io l’aggio fatto ì a cuccà ’a casa soia.
Sav. (arrabbiato). Al solito! Aggio ’a fa corte nuova pure pe Gaetano. Chisto nun fa p’‘a casa mia, mo manne subito a d’’o sanzaro e me faccio mannà n’ato servitore, anze vaco a scriverlo io stesso nu biglietto per farlo sollecitare (via a destra).
