Viaggio di Parnaso/Canto VII
CANTO VII
C
ommo io vidde c’havea quarche tornese
Pigliaie de caudo, e me venette voglia
Bello tornaremenne à lo paiese,
Che mpenzarence schitto havea gran doglia;
Havea nfastidio già le bone spese
Io, ch’era usato schitto a carne, e foglia,
O foglia doce, ò foglia saporita,
De nuie autre rechiammo, e calamita.
Che Canne d’Amarusia, che lecore
De chello, che llà ncoppa Giove licca,
Che mele d’Ibla c’have tanto nore,
Che Gileppo rosato, ò franfellicca,
O foglia mia, Fenice de sapore,
Chi dice lo contrario, che s’appicca,
Hommo privo de nciegno, e de descurzo,
Che n’hà provato maie, che cosa è Turzo.
Apollo, che da vero è gran signore,
E penetra lo ntrinseco golio,
Me chiamma, e pe me fare gran faore,
Fece rescire lo designo mio,
Dicenno, io faccio chello c’haie tu n’core
Perche le cose cchiù secrete io spio,
Saccio ca tu si muorto, ed’allancato,
Pe no bello pignato mmaretato.
Perzò songo contento, che sbignare
Craie tu puozze a le belle toie Serene,
Ma perche a li Poete li denare
Songo nnemmice, ed io te voglio bene,
Piglia sto stoiavucco, e se magnare
Tu vuoie, stiennelo nterra, e bì che bene:
Io giubelanno tutto de preiezza
Lo piglio, e ne rengrazio chell’Autezza.
E pigliato da isso, e da le Sore
Lecientia, parto pede catapede,
Ne l’hora veo, perche de lo valore
De chella pezza faccia à l’uocchie fede:
Io creo ch’erano iusto sidece hore,
Quanno a no vosco me posaie lo pede,
Dove tant’ombre tu nce vide stare,
Che lo Sole se caca de nce ntrare.
Lloco me sedo ncoppa de no prato,
Che parea no trappito de Soria,
Mecco lo stoiavucco llà schiegato,
Ed ecco veo, ma chi lo credarria?
No piezzo de vitella sottestato,
E no pignato propio a boglia mia,
Maccarune, pasticcie, caso, e pane,
E grieco, mangiaguerra e mazzacane.
Io mo strasecolanno, comm’a chillo,
Ch’à lo Nilo, dapò che cresce, e manca,
Vede de na ranonchia, ò sorecillo
Scire nà capo, e mo nò cuorpo, ò n’anca,
Pò tutto sano zompa comm’à grillo:
Cossi bedea da chella pezza ianca
Scire miezo piatto, ecco ca sano
Se vede appriesso, ed io tutto lo schiano.
E mentre cò gran gusto stea à menare
Li guoffole, e pò shioshio à na vorraccia,
Ecco de brocca no giovene appare,
E me dice, bonni, prode te faccia,
Respose io benmenuto, ed assettare
Lo fice, e nce lo tiro pe le braccia,
Isso se fa pregare, e pò se lassa,
Io creo, che faccia quinnece, ma scassa.
Magnato c’happe, disse, hommo da bene,
Tanta robba a no luoco ch’è desierto,
Dimme de razia, dimme donde vene?
Ch’io, pe te dire, me stopesco cierto,
Dillo, e te iuro, Dio me guarde à tene,
Ca no lo dico, se ne iesse spierto,
Dillo, si forasciuto, è t’è portato.
Da chi compune chello c’haie magnato?
Testemmonia vosta, io le respose,
Arrasso sia, che dice ò cammarata?
Pè mente non me passano ste cose,
Nnante ncè fosse mammama crepata,
Ma Febbo sta ventura me refose,
(O potta, sta parola m’è scappata).
Dilla, isso dice, ed io te mostrarraggio
Fuorze a te pò, na bella cosa c’haggio.
Tanto me disse, c’haverra scommuosso
N’hommo, se stato fosse bè de stucco,
E pe levaremillo pò dà duosso,
Io le scopierze de lo stoiavucco,
Ed isso disse, vrociole a no fuosso,
Dove me nce sia fatto no travucco,
Se non và no tresoro, ma à sto shianco,
Porto na cosa, che non vale manco.
E s’asciogliette da lo stregneturo
No fiasco de ligno lavorato,
Decenno, vide, haggio quarcosa io puro,
Se be Nparnaso maie non songo stato,
Po dice, ò vuie che state à chesto scuro,
Scite mò priesto a chesto scampagnato,
Ed ecco scero, lustre comm’a Sole,
Chi me lo credarria? sette fegliole.
De le quale, una disse, ecco Segnore
Le schiave toie, commannale a bacchetta,
Ed isso disse, ò femmene de nore
Portate no cavallo a la Ginetta;
Io mo fora de me pe lo stopore
Teneva mente, e steva a la veletta,
Correno chelle ardite comn’à gallo,
E subbeto portaro lo cavallo.
E pò tornato dinto lo fiaschetto.
E chillo cravaccaie pe ghiresenne,
Io mò, che bisto havea stò granne affetto;
De stò fiasco gran golio me venne:
E disse, ammico mio buono, e perfetto,
Io non haggio n’Agresta ccà, ne penne;
P’accattare tresoro accossi raro,
Ma cagno co sto mio, se l’haie da caro.
Me contento, diss’isso, de cagnare,
E accossi cagnaiemo, e camminaie,
Ma quanno venne l’hora de magnare,
Ch’avea pigliato chiunzo m’addonaie,
E quanne steva pe me desperare,
A lo fiasco mio meglio penzaie,
E dico, scite femmene aggarbate,
E mò lo stoiavucco me portate.
Ed ecco chelle sciute, ecco a no punto
Vene lo stoiavucco, io sedo nterra,
Lo stenno, e mentre faccio lo musso unto,
Manca la famme de me fare guerra,
Gia steva nfine, ed ecco n’autro accunto,
Non faccio se de Trocchia, ò de la Cerra,
E me saluta, io lo saluto, e dico
Addove vaie? da dove viene, ammico?
Isso s’assetta nannze, e pò me dice,
Vengo, pe te la dire, da na parte,
Ch’è meglio assaie dell’Isola felice,
Che maie non basto a diretenne parte,
Sacce ca pe la via notte mme fice,
Ch’io non vedea ne chesta, o chella parte,
E mentre chiagno, na bella fegliola
Vene, m’asciuca l’uocchie, e me conzola.
O ch’isce bella, a l’uocchie d’ogne Fata.
Che pareva na penta palommella,
Portava no dobbretto de colata,
Na cauza rossa, ò Dio quant’era bella,
Na capo à la Scozzese, che ntrezzata
Nc’era na verdegaia zagarella,
N’uocchio, che frezziava, e no mussillo
Da vasarelo sempe a pezzechillo.
Pò fatto a lo terreno no pertuso,
Me fa scire pe chillo a no palazzo,
Pe te la dire, io ne restaie confuso,
E n’happe a deventare quase pazzo,
Pe na grada assaie lustra saglio suso
A na sala, addove erano à sollazzo
Cient’autre Fate belle comm’a n’oro,
Ch’ogn’una porta ncuollo no tresoro.
Io faccio lleverenzia, e tremmo, e a pena
Pozzo tenè li curze pe paura,
Ma spara na vocella de Serena,
Datte armo, c’haie trovato la ventura,
Non t’allecuorde quanno a chella arena
Steva a dormire na lacerta scura,
E no villano accidere la voze:
Ma pe te la pretata nò le coze?
Che gridaste, sta fermo, no le dare,
Che t’hà fatto sta scura poverella?
E lo vraccio faciste sbariare;
Sacce mo cammarata, io songo chella,
Mo te volimmo ccà remmonerare,
Pocca ogn’una de cheste m’è sorella,
Azzò ch’ogn’autro po venga à sapere,
Ca non ce perde maie, chi fà piacere.
Chesto ditto, me portano vedenno
Chisto bello palazzo ntuotno ntuorno.
Non pozzo dire quanto era stopenno,
Se te parlasse chisto, e n’auto iuorno,
Da lo palazzo a no ciardino scenno,
Che n’haverria lo Campo Eliso scuorno;
Ogne frutto ch’a l’arvolo è mpizzato,
Quale è ncomposta, e quale è sceroppato.
Scorre da na fontana Moscatiello,
Da n’autra Manciaguerra, e Falanghina,
Chesta de latte fa no shiummeciello,
Chella de mele corre a la marina,
Sponta a lo prato ccà po frutteciello,
Lla no pede de puorco gnielatina,
Na pergola ncè po de gran bellezza,
Carreca tanto, che se chiega, e spezza.
Lloco de Nola nce sò sopressate,
Lloco sò de Bologna saucicciune,
Lloco saucicce belle speziate,
Lloco a fiasco casecavallune,
Lloco nnoglie à Ghiugliano nmottonate,
Lloco presotta, e caso a buonne cchiune,
Che me parze vedere speccecata
Porta Caputo, quanno sta parata.
Lloco sotta me fanno no banchetto,
Altro che de sarache, e de redice,
Vuoie autro ca me dezero nguazzetto,
Tutta la stremmeta de la Fenice?
L’aucielle paradise happe nbrodetto,
La peo chelleta fù starne, e pernice,
Scomputo de magnare, ecco ogne Fata
S’auza a fare na bella mpertecata.
Se chesta fu na vista de Segnore,
Penzalo tu, ca no lo pozzo dire.
Duraie lo ballo pe no paro d’hore,
Che propio nbruodo io me n’haviette à ghire,
Na cetola sonava de stopore,
Una de chelle, che facea dormire,
N’autra d’esse sonava no strommiento,
Che doie corde facevano pe ciento.
Fatto lo ballo nce ne iammo arreto
A la palazzo, ed a no cammariello
(Che steva a no recuoncolo segreto)
So portato, e me danno no cortiello,
Decenno, hagge assaie caro sto segreto,
Ch’addovonca lo mpizze, e dice, aucielle,
Subbeto e fatto, e cinto a tutte banne
De forte mura no Castiello granne.
Io tutto alliegro piglio sto presiento,
E le rengratio, e basole le mano
E perche da lo suonno havea trommiento,
Se n’addonaro, e bello pe la mano
A no lietto me mesero d’argiento,
Addove m’addormiette chiano chiano,
Me sceto, allizzo, e raspo lo caruso,
E trovome da fora lo pertuso.
Mentre ch’isso contava, io spantecato
Steva à sentire chisto bello cunto,
E po le dico, se te vea nzorato,
Fà che ne vea la prova a chisto punto,
Ca po te dico, e restarraie spantato,
Che bale chisto se bè sta sedunto,
De razia, disse chillo, e quanto mpizza,
Decenno, auciello, e no Castiello sguizza.
Io stoppafatto resto, e mantenere
Volenno la prommessa, faccio ncoppa
Lo stoiavucco priesto comparere
Le menestre addorose a chioppa a chioppa:
Ch’isso pe mmaraveglia, e pe piacere
Smerzaie l’uocchie, e restaie commo de stoppa,
Io dico, mo lo pesco st’aseniello,
Ed à ste granfe vene lo cortiello.
E dico, be n’è cosa da stordire?
E disso à me, strasecolo a fe mia,
Ed io soggiongo; se me vuoie faurire,
A cagno e scagno fare mo vorria,
Isso mostraie desgusto de sto dire
E respose sgregnuso, arrasso sia,
Che pe na pezza io chisto voglia dare,
Crisce la dosa se vuoie ciammellare.
Io che n’era piccato, e sò corrivo,
L’offierze lo fiasco pe refosa,
Isso vede la prova, e comm’arcivo
Subbeto canoscenno ch’è gran cosa,
Se contenta, io preiato parto, e arrivo
Sempe sautanno frisco comm’a rosa,
La sera a no casale d’Arbanise,
Ma co gran famme, e non m’ashio tornise.
Pagame dice l’Oste, e ba tè mpienne,
Ca non s’alloggia ccà senza denare,
Io respose, sta zitto frate ntienne,
Ca no bello Castiello voglio fare,
Se tu si ntiso, li piede nce stienne,
Lebrecaie chillo, appila non parlare,
Ca pe certa raggione sottestato
Non ce vonno castiello fravecato.
Io sfilo zitto, e mutto, e guatto guatto,
Conzidera tu mò cò che dolore,
E pe famme facea quase lo tratto,
Commo cannela, che senz’uoglio more
O male cellevriello, e che m’haie fatto?
Decea, c’havea na cosa de valore,
E me la fice bello cottiare
Lo Cortiello haggio, e n’haggio che tagliare.
Lo bene non se stimma, ò prezza maie,
Se non se perde, ò stoiavucco amato,
Ch’iere vero confuorto de li guaie,
Dove si ghiuto, e chi me t’ha levato?
Fiasco mio perche te desprezzaie?
Che mò me l’havarrisse retornato,
Magna verlascio, ohimme sto pe despietto
Pe me mpizzare sto cortiello mpietto.
Dovonca vao tento la sciorte mia,
Pe fare a quarche parte sto castiello;
Ma chesta tene ognuno ch’è pazzia,
E dice, a lo spetale, o poveriello,
Vago a Spagna, e a Shiorenza, e manco cria
Faccio se be ne mostro lo modiello.
Vago a tant’autre Terre, ognuno dice
Va piglia le cient’ova, hommo nfelice.
E dapò tanta guaie, e tanta stiente,
A Napole mio bello so tornato,
Ma non trovo ne ammice, ne pariente,
Da quale potesse essere aiutato,
Puro sta cosa a me non se dà niente,
Ca m’aggio ncatarozzola chiavato,
A crepantiglia d’ogne caperrone,
Co sto cortiello fareme barone.
Tutta la notte peozo a lo designo,
E chiammo gente, e faccio mille patte,
Mò nc’acconcio na sala, e no soppigno,
Mò tronere, mo fuosse, e torre chiatte.
Mò cantine pe lagrema, e sorvigno,
Mò porte, mò fenestre, e case matte.
Quanno è pò fatto, che me stisso spanta,
N’haggio luoco pe farence la chianta.
De Lemos chillo Conte, che fa guerra
A la Nmidia, e a lo tiempo, me prommese
De fareme acquistare tanta terra,
Che lo potesse fare a sto paiese,
Ecco se parte, e sta speranza sferra,
O fortuna contraria ad aute nprese!
Lo frate puro s’è de me scordato,
Che m’havea de speranze nmottonato.
Macare me potesse cenzoare
Quarcosa nmiero de capo de monte,
Oh che bello Castiello vorria fare,
Addove se trasesse pe no ponte,
Tutto de ntuorno lo vorria murare,
E po starence dinto comm’a conte,
Che magne po? Io venno, e a che palazzo
Po staie? ne faccio n’autro, ohimmė so pazzo.
Sto penziero m’allarga da la Musa,
Chisto scire me fa de cellevriello,
E chisto pe freneteco m’accusa,
A tutt’hore penzanno a sto castiello,
Ad ogne bene m’è la porta chiusa,
Mannaggia chi me deze sto cortiello,
Cossi bà chi è catarchio, ed e pacchiano,
E CERCA meglio pane, che de grano.
SCOMPETURA.