Canzone e Ariette nove/Ariette nove/Aspetta 'a primmavera...
Aspetta ’a primmavera.....
Aspetta ’a primmavera.
Aspetta ca stu velo
scuro d’ ’o vierno nu se vede cchiù.
Aspetta. Aspetta
na jurnata sincera,
n’at’aria, n’ata luce e n’ato cielo…
(E ’a bella primmavera
addurosa, è bbenuta —
ma pe tant’ata gente e no’ pe mme.
E, ’o ssoleto, è passata,
fresca, priata,
allera —
e fermata nun s’è: se n’è fuiuta…).
Està, c’adduorme — afosa,
abbagliante, pesante,
che martirio che si’!
Venesse autunno!
E cadessero ’e ffronne,
lentamente,
nziemm’ ’o silenzio suio,
ncop’ ’a stu munno….
(Ma che buo’? Ma che guarde,
tanto luntanamente,
anema mia scuieta?
Che desidere cchiù,
si è troppo tarde?…).
This page was moved from . It's edit history can be viewed at Chiàcchiera:Canzone e Ariette nove/Ariette nove/Aspetta 'a primmavera...