Canzone e Ariette nove/Ariette nove/Quanno stammo vicine...
Quanno stammo vicine…
Quanno stammo vicine
’a cchiù piccala cosa
o ce fa troppo male
o troppo bene:
’o certo è ca cuiete,
comme stanno tant’ate
nnammurate,
nuie nun sapimmo sta..
Ma pecché?…
Ma chi sa?
Quanno stammo luntane,
e ca proprio st’ammore
ce pare ca vo fa
cattiva fine,
nu ricordo, nu suono,
nu mutivo ’e canzone
’a passione
fa cchiù ardente scetà…
Ma pecché?
Ma chi sa!…
O vicine o luntane
è sempe ’a stessa cosa,
e overo nun ce pò
niente e nisciuno!
Comm’a me tu te struie,
ca so’ sempe scuntento,
e so’ cuntento…
Che vo’ di’? Che sarrà?
Ma pecche?
Ma… chi sa?…
This page was moved from . It's edit history can be viewed at Chiàcchiera:Canzone e Ariette nove/Ariette nove/Quanno stammo vicine...