Canzone e Ariette nove/Canzone nove/Serenata a na vicina
Serenata a na vicina.
Viuline, accumpagnateme nzurdina,
e vuie, chitarre, nun ncasate ’a mano:
porto sta serenata a na vicina
ca lle piace d’ ’a sentere ’a luntano.
Mm’arraccumanno: ’a musichetta è fina…
’O coro - zitto zitto e chiano chiano -
’o coro ha dda di’: «— Bella!
«Cchiù bella ’e tante ate!
Scusate,
e cumpatite
chesta serenatella…».
E tu, luna sincera,
luna janca e gentile,
tu falla ntenerì!
Stammo int’Abbrile….
Abbrile addora — e vuie site addurosa!
D’’e ruselle nuvelle Abbrile è ’o mese,
e ’a vocca vosta è na rusella nfosa!
E ’o core vuosto è tìennero e mullese!
Marzo v’ha dipingiuta cuntignosa:
Abbrile v’ha dda fa’ doce e curtese!..
E ’o coro ha dda di’: — «Bella!
Cchiù bella ’e tant’ate!
Scusate,
e cumpatite
chesta serenatella…»
E tu, luna serena,
luna doce e gentile,
tu falla ntenerì…
Stammo int’Abbrile!…
This page was moved from . It's edit history can be viewed at Chiàcchiera:Canzone e Ariette nove/Canzone nove/Serenata a na vicina