Divina Commedia (Napulitano)/27
Deritta stea la sciamma e assaje cojeta
Pe non ddì cchiù, e da nuje se nne jeva
Co lo permesso de lo sio Poeta;
Quanto n'autra arreto lle veneva,
De nuje ognuno ll'uocchie nce avotaje
Pe no suono che ffora llà n'asceva.
Comm' a ttoro d'abbrunzo che strellaje
Co lo chianto de chillo, e fuje deritto,
Che primma co a limma temperaje,
Strellava co la voce de l'affritto,
Tanto che simbè fosse ramme fuso,
Pure pareva addollorato e fritto,
Ccossì pe non avè via, nè pertuso
Da o pprencipio de lo ffuoco, tanno
Parlava comme sciamma tene ll'uso.
Ma appena llà jettero viaggianno
Ncopp'a la ponta dannole no sguizzo,
Comm'a lo ffuoco jevano parlanno,
Sentettemo: Io mo a tte ccà mm'adderizzo
La voce che parlava mo Lommardo,
Dicenno: Va, ca io mo cchiù non te stizzo;
Ca so fuorze arrivato quase tardo,
Ma voglio che co mmico staje a parlare,
E vide che pe ffàrelo io già ardo.
Si tu ccà dinto stato sì a arrivare
Cadenno ccà da chella docia terra
Latina, addò stette io sempe a peccare,
Li Romagnuole stanno 'mpace o 'nguerra?
Ch'io de li munte fuje de ncoppa Urbino,
A Montefierto che lo sciummo 'nzerra.
Io steva abbascio ancora attiento nzino,
Quanno lo Masto mme tentaje de costa,
Dicenno: Parla tu, chisto è latino.
E io ch'avea già pronta la resposta,
Llà subbeto a parlare accommenzaje:
O anema, che lloco staje annascosta,
Romagna toja non è, e nè fuje maje
Senza guerra a lo core de tiranne;
E nisciuna io me llà nce nne lassaje.
Ravenna sta comm'è stata tant'anne:
L'Aquela da Polenta llà nce cova,
E Cervia la commoglia co li panne.
La terra, che ffacette longa prova
E de Francise fice no maciello,
E sotto a l'Orderaffe mo se trova;
E ppò li Malatesta, a tanto piello
Ficero de Montagna aspro govierno,
N'ommo accedenno comm'a n'auciello.
La cità de Lammone e de Sautierno
Lo lionciello porta a nido janco
Che mmuta parte da la stata a bierno:
E chella che lo Savio 'nfonne 'nscianco
Stanno accossì nfra lo chiano e lo monte,
Nfra terannia se campa e stato franco.
E dince chi si mmo, lo tutto conte;
Non esse tuosto comme ogne autro è stato,
Si a lo munno lo nomme tujo nce à fronte.
Quanno lo ffuoc llà fuje cchiù attezzato
L'acuta ponta lesto llà smovette
Da ccà e da llà, e ppò dette isso no sciato,
Che la risposta mia fosse, credette,
A perzona che maje tornasse a mmunno,
Chesta sciamma starria, comme nce stette;
Ma pecchè mmaje mperò da chisto funno
Nisciuno nce tornaje, sì sento overo,
Senza paura io te risponno 'ntunno.
Ommo d'arme fuje io, pò cordigliero,
Credennome accossì fà penitenzia,
E sto credere mio non era a zero.
Si lo ffosse lo Papa a sta scajenzia
Che mme fice a lo munno già peccare,
E tutto tu mo ntienne co pacienzia.
Mentre che d'ossa e ccarne stette a ffare
A che la Mamma mia, pure tu sacce,
Zzò ch'io facette non se pò contare.
Scopremiente fice io co li mustacce,
E nnanze pò fice ire la mal'arte,
Che suono da la terra ascette nfacce.
Quanno arrivaje io pò da chella parte
De l'aità mia, quann'uno avrìa no poco
Calà le bbele ed auzà le ssarte;
Zzò che piaceva a mme cchiù mm'era fuoco
E pentuto fice io li cunte mieje,
Ah, poveriello a mme, dinto a sto luoco!
Lo Prencepe de nuove Farisieje
Avenno guerra nfaccia Latarano
E nè co Saracine, o co Giudieje,
Che ogne nemmico sujo era Cristiano,
E a vencere non era stato ad Acre,
Nè mercante a la terra de Sordano;
Nè autro affìcio, e nè l'ordene sacre
Guardaje a isso, nè sta corda priesto
Che solea farle li voccune macre.
Ma, comme Costantino a san Serviesto
De sanà ggente lo pregaje a Siratte,
Accossì chisto mme cercaje a Maesto
Pe sanarlo da freva a chisti fatte.
Mm'addimmannaje conziglio, io stette zitto,
Ca mbriache sti mutte erano 'nfatte.
Pò dicette: Non sospettà da guitto,
Pe mmò t'assorvo, e tu me 'mpare a ffare
Comm'a li Penestrine, e sto a lo stritto.
Lo cielo pozzo aprire e ppò nzerrare,
Comme tu saje, ma so ddoje le cchiave,
Ca l'autro Papa non tenette care.
Li pile allora io llà vedette trave,
Accommenzo a pparlà co gran coraggio,
Dicenno: Patre, da che tu mme lave
De lo peccato che mmo da fare aggio,
Longa promessa, e mmantenuta a ll'uorto,
Trionfante te fa pe sto viaggio.
Venette San Francisco appena io muorto
Pe mme, ma n'Angiolillo niro niro
Dicette: Non parlà, ca mme faje tuorto.
Nfra li mieje venì se n'à a sto ggiro
Pecchè conziglie dette fraudoliente
Pe lo quale io so mmiso ccà, e m'ammiro;
Non se pò assòrvere a chi non se pente;
Nè pentire e bbolè se pò una vota,
Pecchè nc'è ccosa che non lo cconzente.
Oh poveriello a mme! comme se vota
Sta capo quanno mme dicette chillo:
Tu non penzave a mme manco na jota!
A Menuos me portaje no pocorillo
Otto vote la corda ntorciglianno,
E pe ll'arraggia morza dà e no strillo.
Nfra l'annasuso fuoco àje d'avè danno,
Pecchè addò vide llà songo perduto,
E vestuto accossì mme sto arraggianno.
Quann'isso avette de parlà fenuto
La sciamma llà scappaje nfra chilli 'mpise,
Torcenno chillo cuorno accossì acuto.
Passajemo nnanze io e lo Masto appise
Nfra scuoglio e scuoglio, e stammo pò venenno,
Nfaccia a lo fuosso addò so tutte mise
Li peccature fatte scommettenno.