La Vaiasseide/L'Autore alle Leggeture
L’AUTORE
alle Leggeture.
E chiu de cincociento
storie se po vedere
muto bene
quanto songo state
nognentiempo
lostrisseme, e nobelisseme le Vaiasse;
e stenga zitto Homero, che
dice ca li Pruoci se nnammorattero
de Penelope, ca ne mente pe la canna,
pocca se trova scritto ca erano
spantecate pe le vaiasse; E Hercole
havenno venciuto tante vestie pe
chiù granne grolia soia voze essere
vaiassa, e co le vaiasse de Iole filava
tutto lo iorno la lana. E chillo, che
facette cacare de paura tutte li
Troiane, non se vestette perzì da
femmena, e pe havere parte delle
laude vaiassesche non se fece vaiassa
della bellissema figliola de lo Rè Liccomerda?
Et Apuleio non voze chiu pe
na cernuta de Lucia vaiassa
de Petronio, che pe tutte li sfuorge, e bellizze de Laura Bolognese? non voglio dicere mò de Sardanapallo, e de tante autre, che vozero puro provare tanta nobeletate, e grannezza de vaiasseiare, ca sarria lo conto del l’Huorco; vasta dicere ca chiu priesto se poteriano contare à uno à uno tutte li vuroccole, che se magnano la Quaraiesema à Napole, tutte le cetrangola, che se spremmeno tutte le zeppole, che sguigliano, e tutte le ranonchie de lo lago d’Agnano, che dicere la manco parte delle lloro grannizze, e bellezzetudene cose; e io mo che me songo puosto à chisto ballo de poetare sopra de chelle, haggio granne paura de fare lo sauto d'Icaro, perche me voglio nzeccare allo caudo sole de tante bellezze, co le ascelle mpiccecate co la cera; ma non haggio raggione de dobetare, perche se Icaro cascatte à maro, non comportaranno le piatose Vaiasselle meie, ch’io puro me ne venga rociolianno nterra pe l'ammore lloro, ma corraranno tutte à rompecuollo
co le pettole auzzate pe me aparare,
accossì cascanno à lo ceniero nomme
faraggio male; chesta speranza
me face anemuso, tanto che me sforzaraggio
se non tutto allommanco
’mparte dicerenne quarche cosa; ma
perche l’autezza de la materia è accossì
granne, che nce vorria autra
chiricoccola, che la mia, tutta vota
m’arremmetto alla sprofonna cortesia de vuie letture sapute, ca scosarrite
l’arrure, che saranno nchisto componemiento,
consederanno ca non me
scappa pe le brache l’arte refettoria
de Tullio, ne la grammateca pelosa,
e se puro nce ashiate quarche cosa
de buono, datene le gratie à Febo,
ca isso pure fu vaiasso de Ammeto,
e mo hà boluto favorire le laude de
la vaiasseria, e pregandove da Cielo
sanetate e tornise assaie, me veraquaquiglio.