La Vaiasseide/Lo Stampatore alle Leggeture
LO STAMPATORE
alle Leggeture.
L O Segnore Giulio Cesare Cortese (academechescamente parlanno) lo Pastore Sebeto havenno visto ca non cossì priesto cacava la Musa soia no canto de chisto Poemma, che subeto n’era sorchiato comm’uovo frisco è portato ’mmocca à la stampa, e ca paricchie havevano dell’aseno (co lleverentia) de dicere ca l’havevano fatto lloro; s’eie resoluto de scompirelo, e farelo stampare, e ire co lo nomme suio, azzò non se pozzano chiù le gente cauzare li stivale suoie commo hanno fatto fi mò à pericolo de schiattarencille; perchè le penne d’auciello non ponno servire pe varda; io mo che faccio ca le Segnorie Voste hanno golio de vederlo tutto comprito, me l’haggio zeppoliato, e co licientia soia, e de li Suppriure l’haggio stampato co la chiù granne ndelegentia c’haggio potuto, e ne facciono presiento a tutte chille che se lo iarranno ad accattare à dove se venne.