Carduccianelle
Collezione minima
GIOVANNI CAPURRO
CARDUCCIANELLE
CON LETTERA PREFATORIA
DI
GIOSUÈ CARDUCCI
(TERZA EDIZIONE)
NAPOLI
Luigi Pierro, editore
Piazza Dante, 76
CARDUCCIANELLE
GIOVANNI CAPURRO
CARDUCCIANELLE
CON LETTERA PREFATORIA
DI
GIOSUÈ CARDUCCI
(TERZA EDIZIONE)
NAPOLI
Luigi Pierro Tip.-Editore
Piazza Dante 76
1907
Proprietà Letteraria
Napoli - Stabilimento Tipografico Luigi Pierro e Figlio
Come nacquero queste Carduccianelle
Fu così : Le Odi barbare del grande italiano mi conquistarono per la potenza del verso austero e zampillante insieme.
E considerando l’efficacia di quella metrica che — come scriveva Egli stesso - s’informava alla lirica dei greci e dei latini, io pensai che la nostra poesia dialettale, così ricca di vocaboli e di espressione, se ne sarebbe potuta avvantaggiare nella medesima maniera.
Ciò premesso, non restava, che tagliare la stoffa napoletana su quella misura e rivestire la musa aristocratica con abiti da popolana. Provai. Vi perdette essa in bellezza ?
Il tentativo delle odi e delle asclepiadee richiese tempo e lavoro, ma continuai decisamente, lungo il ginepraio degli esametri, dei pentametri e dei gliconici.
I primi due saggi furono pubblicati dal Corriere di Napoli e dal Pungolo, ed insieme con alcuni altri li mandai al Maestro, arrischiando la richiesta del suo parere perchè il mio povero libriccino si facesse bello del suo nome in caso di assoluzione.
E la prefazione venne, dopo qualche tempo, quando più non la speravo. La trovai già composta nel Don Marzio, dove allora ero redattore, e dove i miei colleghi vollero farmi una graditissima sorpresa.
Eugenio Sacerdoti, direttore allora del surriferito giornale ed amicissimo del Carducci, la fece precedere dalle seguenti parole:
« L’amico e collega Giovanni Capurro ha compiuto un tentativo assai ardito, componendo le sue napoletane Carduccianelle, sul metro e alla maniera delle Odi barbare di Giosuè Carducci.
« Quanto studio e quanta fatica sia costato al mio modesto ed operoso amico, sappiamo noi tutti del Don Marzio. Ma la sua fatica ha ottenuto un premio superbo: il Carducci, buono quanto grande, gli ha scritto questa lettera che io sono orgoglioso di pubblicare ».
Le mie Carduccianelle furono dunque pubblicate ed inviate pel primo al mio Massimo prefatore, ma otto anni dopo mi pervenne la seguente cartolina:
Bologna 1° nov. 1901
« Caro Signore
Avrei bisogno del suo opuscolo « Carduccianelle » versi con lettera di Giosuè Carducci.
Sarebbe ella tanto buono dà farmene tenere una copia?
Giosue Carducci
E subito dopo l’invio di due copie, l’una della prima, l’altra della seconda edizione, ebbi un’altra cartolina semplicissima, brevissima, ma di sapore più intimo ed affettuoso ancora:
« Grazie
Bologna 10 nov. 1901
obbl. aff.mo Giosue Carducci » |
Nondimeno, giacchè gli uomini si giudicano con molta faciltà, s’è detto che il Carducci fosse straordinariamente superbo.
Quanto a me, sono così convinto del contrario che non saprei metter fuori questa terza edizione delle mie Carduccianelle senza ristamparla quale omaggio alla memoria di Lui, mentre l'Italia intellettuale s’inchina riverente e commossa innanzi la tomba del suo altissimo poeta.
E senz’altro, ecco la lettera :
Bologna 30 gennaio 1893
Caro Signore,
La metrica delle Odi barbare io non avrei pensato mai potesse servire a poesia dialettale o popolare; non pareami fatta a ciò. Ma Ella se l’ è presa e vi ha messo dentro arditamente e sveltamente del suo. Tutta sua è la prova e la vittoria. Ed Ella non ha bisogno d’imporre alle cose sue un nome che importa derivazione e diminuzione.
La saluto.
Giosue Carducci
IN PRIMMESE.
Dal Preludio alle Odi barbare.
Si: m’ha seccato sta puisia già stracqua,
sta puisia fredda, moscia, sguancïata,
c’hanno arreddotta che scapezza sempe
senza di’ niente.
A me mme piace forte, traseticcia,
tutta sustanza: s’ha da afferra a vuolo
comm ’a farfalla, quanno nnante a ll'uocchie
fa ll’angarella....
quanno fa comme ’na bella guagliona
che ncappa mmano a quacche cacciatore :
essa fa forza, chillo ’a stregne, e ’o pietto
saglie cchiù bello.
'Nu lassa e piglia, ’nu vase ogne strillo,
e pe’ tramente va ’int’all’uocchie, ’o sole,
tutte ’e capille d’oro, comme a ll’onna,
sbatteno ’’o viento !
A CHIARINA.
Tu parle, e dice ca nun so’ cchiù chillo,
ca nun te voglio manco tanto ’e bene,
ca quase sempe te risponno friddo
friddo, seccato,
Tu parle, e dice ca mo vengo a raro,
ca m’è passata tutta 'a gelusia,
ca nun te curo, ca mo penzo a n’ata
femmena, certo.
Si’ tu ca ’e dice tutte chesti ccose ?
Stu surdiglino, dimme, chi t’ha fatto?
Iammo, dimmello franco, e tu t’ ’o ccride ?
tu pienze chesto ?
Ma nun capisce ca si so stunato
nun è pe’ niente? tu nun ’o capisce
ca i’ dormo poco ? ca nun trovo pace,
sempe penzanno ?
Agge pacienza, perdoneme... siente,
te voglio bene... ma... pecchè ngannarte?
nne tengo n’ata, si, nun è buscia,
scippela ’a pietto !
Scippela forte, ma... nun ’a fa male:
’a puverella nun ce nn’ave corpa :
pe’ mezzo tuio l’aggio dato suonno,
anema e core.
Guarda, nun vide ? tengo ’a freva ncuollo,
’na smania nzista : penzarria e screvesse
pure durmenno : siente cca che fuoco !
tuoccheme nfronte !
È ’na carcara: dint’ ’e celevrelle
sento... che saccio... ’na cosa che volle;
m’arraggio, strillo, sto’ sempe nervuso,
tutto me scordo.
Me so’ addunato ca pare ’nu scemo,
ca quase quase vaco a fernì pazzo :
ma tu si’ stata ca mm’ ’e puosto mpietto
n’atu vrasiere.
Si, tu si’ stata ca mm’ ’e apierto ’o cielo
cu st’ uocchie nfame, tu mme ce purtaste
e mme diciste: — Songo ’a Puïsia:
guardeme e scrive !
MATENATA ’E VIERNO.
’O friddo scioscia, taglia proprio ’a faccia:
pe’ ll’aria cupa cupa, senza sole,
’e ppagliuchelle, ’e ffronne, ’e piezze ’e carta
votano attuorno.
Arravugliato ’int’ ’a ’na petaccella
’e scialle viecchio, tutto spertusato,
’o lavurante corre, scarfa ’e mmane
forte c’ ’o sciato.
Ma ’e mmane, rosse comme è russo ’o naso,
so’ già gelate... Che buò dà calimma!
Forze ’o ri’ sordo ha dato a ’e figlie, e penza
’a presa ’e rumma !
Luntano siente ’na voce:—C’ ’o brodo
’a fresellina, chiena ’e sale e pepe ! —
e ’i piezze ’e neve, comme a sciucchetielle,
chioveno ncuollo!
CAFFÈ DELL’ALLEGRIA..
Accussì dice nfaccia a ’na tabella
chiena ’e felinie, antica, sengata;
e sotto ’a porta ’nu muscillo niro
se lava ’a faccia.
Fora, a dderitta,- sta ’nu gallenaro :
ncoppa ce stanno tre meze gazose;
’nu cafè scicco, n’aristucrazia,
manco a Tuleto !
Dinto ’nu scuro, quase nun se vede,
e piccia piccia sola ’a lampetella,
ncap’ ’o bancone, fa nu poco ’e luce
nnante a Sant’Anna.
’Nu divaniello ch’esce ’a stoppa ’a fora,
tutto nzevato, cu ’a spallera rotta:
dui’ tavuline cu ’e piede ’e lignamme,
d’ ’o cincuciento,
tanto pulite ca te fanno schifo,
pare ca tanno s’abboccano nterra!
E ncoppa ’e marme, spuorche ’e cafò-zoza,
scialano ’e mosche.
’Nu spicchietiello ca te può fa ’a varva
sta cummigliato cu ’nu velo giallo,
manco si fosse ’na spicchiera ’e Francia,
’na cosa ’e prezzo!
Chi sa ’a quant’anne chelli tre butteglie
stanno llà, nfrisco, int ’a na scafarea:
’a sotto, ’o gallo s’è ngrifato e mena
morze arraggiate.
’A princepala, cu ’a canesta nnante,
mmiezo ’a puteca, pulezzanno ’e ssarde,
nne leva ’e ccape; po, guardanno fora,
chiammma ’o muscillo.
’E GIOCHE ’E FORZA.
Se so’ fermate: guardano ’e barcune:
n’uocchio a ’e ffeneste, pe’ chisà s’affaccia
quaccuno ’a coppa, cu ’e facce arreddotte
gialle p’ ’a famma!
’O grussiciello sona ’na trummetta
meza sfiatata; n’atu piccerillo
sona ’a rancascia, pe’ tramente ’o pate
stenne ’o tappeto.
Fa proprio friddo! Nun s’è fatto niente.
Cierti magliune larghe, arrepezzate,
spuorche e già strutte, nfaccia a chelli gamme,
mmostano ll’ossa.
— Salto mortale! — fa ’o cchiù grussiciello,
piglianno ’o frate ncuollo ’e spalle soie,
e ’a criaturella fa ’nu sfuorzo e cade,
ppuffete, nterra.
Tutte ’e guagliune, ognuno attuorno ride;
ato che salto! ce vo carne e vino!
Chille, scummetto, nun hanno pruvato
manco acqua fresca!...
Hanno fernuto: manco cca ’nu soldo!
’o pate ’e gguarda e se mozzeca ’e ddete!
— Iammo, ’a carretta! Viene mbraccia. — Ah, comme
ballano ’e diente!...
SILENZIO..
È notte: nun so sente manco n’anoma;
tutte ’int’ ’e case lloro già riposano:
Puro Fanny, ncoppa ’a pultrona ’o mocano,
dorme, accucciato a tortano.
Quacche suspiro luongo, a raro, o, ttaffete,
piglia ’nu zumpo e mme guarda avutannose,
ma llà ppe llà s’accoccia ncopp’ ’o morbeto
e torna a durmì, subbeto.
Ogne tanto m’avoto e veco correre,
’a dint’ ’e lastre d’ ’o barcone, ’e nuvole,
pe’ nnanze ’a luna, comme a tanta pecore
ianche, ’e vammacia vergene.
’O chiaro ’e luna già s’arriva a stennere
nfaccia ’a caiola, e veco ca ’o canario
che dorme doce doce ncopp’ ’o spruoccolo,
mme pare ’na pallottola!
E guardo ’o lietto; ma, turnanno a nfonnere
a penna, penzo, nfra ’nu vierzo e n’auto:
Pecche nun dormo? Dorme tutto ’o prossimo...
Che pace. Che silenzio!
Sulo ’o rilorgio a mmuro, dint’ ’a cammera,
cu chillo tticche tta nun trova requie,
s’è miso dint’ ’e cchiocche, nun se sazia,
pecchè ll’ore nun dormono?
E tticche, tticche; sento pure scorrere
’o rubbinetto ’e ll’acqua ’int’a ’na congola:
a poco ’a vota chelli ggocce scolano,
cagnanno tuono, e accresceno
sempe ll’at’acqua: tticche, tticche: propeto...
pare ’a battuta ’e ’nu maestro ’e musica,
che sta mmiezo ’e cantante dint’ ’a cchiesia
quanno se canta ’o vespero.
Dormono tutte quante; ma che liepeto
fa ’na mosca ngappata int’ ’a felinia!
A poco a poco già l’ammanca ’o spireto;
zitto, ha fernuto ’e chiagnere!
Ah! si durasse sempe ’stu silenzio,
quanta patenze ca se sparagnasseno!
ma tticche tta cammina! Iammo, scetateve
ch’è ghiuorno, iammo a fa ll’opera!...
’A BONAFFIGGIATA.
Diceva buono Don Giuseppe Giusti,
quanno diceva, bonanema soia:
« Cu poche lire diviente signore! »
miette ’a carrozza!...
’O iuoco è certo ch’è nu vizio nfame,
ma po se sape ch’è ’na cosa unesta:
cu ’na jucata può fa dint’a niente
n’opera bona.
Uno se mpara, per esempio, ’o nove
si ha da ascì terzo, quanno vene quarto;
’o primm’aletto, cu ’a fiura ’e seie,
anze capisce
si iesce a’ smerza; sape ’a smorfia, sape
’nu munno ’e cose: l’ambro situvato,
si nce vo’ ’o terzo, quanno è meglio asciutto,
ll’arte, se sape!
Mo simmo ’o fatto, piglia a Barbanera!
Chillo ha refuso cisto, carta e suonno,
pecchè? p’ ’o bene d’ ’o prossimo suio,
nfaccia ’a ’nu libro.
Passammo appriesso: chillu cabbalista
d’ ’a Nuova Stella, ca tutte sapimmo,
comme criscette tanto ’na perucca
nzi’ ’a ncoppa ’e spalle?
p’ ’o bene ’e ll’ate, pe’ vedè cuntente
povere e ricche; chesto ognuno ’o ssape;
e chi capisce, cu ’a regola soia,
vene ’o mumento
c’afferra ’a sciorta! Certo ca ’o Guverno
nun permettesse ’na cosa cattiva!
anze, refresca ll’aneme scurdate
ogne semmana.
Dice: aggiu perzo! se ne vene n’ato,
piglia e biastemma, straccia tutte cose,
che te succede? ca ’o sabbato appriesso
ttaffete e ghiesce!
’O iucatore, quanno nun è buono,
s’ha da sta zitto. C’ha da fa ’o Guverno?
Quanno nun saie ’a situazïone
tienete ’a posta!
CARITÀ.
Parola santa, larga quant’ ’o mare,
ca proie ’a mano, sose a chi è caduto
e annetta ll’uocchie, ll’uocchìe ’e chi pe scuorno
chiagne annascuso.
Allora è bella, tanno è santa overo
quanno pur’ essa cerca dint’ ’o scuro
’o frate suio, senza fa remmore,
senza rancascia.
Quanno pur’essa va nascostamente
addu chi chiagne, pe’ lle dà sullievo,
e chiamma, e scava, fino a che se trova
faccia cu faccia.
Ma ’nu risastro, ma ’nu terramoto,
’na lava ’e fuoco, ’nu vapore perzo,
so’ cose brutte, cose serie assaie.
Comme te vene
’e dà ’na festa mentre llà se chiagne?
Dice: è ’nu mezzo pe’ fa bene. È overo:
chillo che soffre gudarrà pur’isso
quanno po’ è doppo.
Levanno ’e spese, chello che rimane
se manna fora; spisso faie ’o cunto
e nun abbasta manco a ’na famiglia,
tanto ch'è poco!
Gente mpazzuta, gente senza casa
che chiamma aiuto; criaturelle sperte
mmiezo ’e campagne; e ’a carità che sciala,
magna e sbutteglia!
No: nun sta bene. Lacreme e risate!
Nun è cevile ’a carità c’abballa
tutta scullata e fa ’a primier figura
e... a famma aspetta!
’A IETTATURA.
Nun sulo ’e ffemmene pe’ niente attaccano
’nu priggiurizio, facenno chiacchiere;
siente: ’a bella Mbriana,
’o Munaciello, ’o cancaro;
e ’i figlie crescono ciucciune, stupete,
pecche lle mparano tutte ’sti storie;
’o suonno è bona nova,
e ll’uoglio è mal’aurio;
’o vino è grazia, ll’uva so’ lacreme,
’o ddoce è tuosseco, veleno ’o zuccaro,
seh, seh: iate, parlate,
e mo se perzuaresceno!
Ma, ca se roseca sulo p’ ’e femmene;
è beninutele: vide ciert’uommene
ca teneno talento,
ca so’ perzone ’e sturio;
teneno ’o leggere, teneno 'o scrivere,
eppure crereno, se ncapunisceno
ch’esiste 'a iettatura!
Guardate si è pussibbele!
Ogge ricapita... mettimmo... Tizio?
basta che diceno: —guè guè, rattateve,
chist’è ’nu iettatore!
n’ha fatto passà luotene! —
È fritto ’o ffecato! può di’ scurdammoce
ca tutte ’o scappano comme a demmonio...
Si fosse n’appestato,
pure ’o rispettarriano!
Ma, mo ’na stroppola, dimane 'a critica,
po ’na calunnia, s’abboffa ’o mantece;
dalle e dalle, ’o penziere
se fissa e dice: accidete!
Pecchesto capita ca ll’ommo serio
t’ha da fa ridere, ma senza genio,
e tu meglio ca ride,
quanno nun te fa chiagnere!
ESEQUIE.
Quanno mmiezo a ’na strata m’attocca ’e vedè, cammenanno,
’nu bellu carro, serio sì, ma lussuso;
quanno veco ’o cucchiere cu tanta ’na mitria ’int’ ’e rrecchie,
e ’i serviture vestute ’a brigatiere,
chella giandarmaria mme pare ’na cosa ammentata
ncoppa San Carlo, quanno fanno ’e cumparze.
Quanno appriesso a ’stu carro ce veco sissanta, sittanta
carrozze ’affitto... canuonece... pezziente...
curone ’e sciure frische... cucchiere che vanno rerenno...
’nu munno ’e robba c’abbaglia sulo ’a vista,
nun penzo allora ’o muorto, ma penzo ca tutto è pavato,
ca pure ’a morte s’avota a carnevale!
E trovo ’nu vico? subbeto subbeto, avoto
comme a ’nu pazzo, propeto pe’ ridere!
Rido, cunsideranno ca cchiù se fa viecchio ’stu munno
e cchiù addeventa piccereniello ’e latte!..
SERENATA..
Era ’o pprincipio ’e maggio: che luna, che scicca serata!
c’addore ’arance se spanneva p’ ’o vico!
’A gente nnante ’e vasce facevano ’o ppoco ’e trascurzo,
e na cicala strillava ’int’ ’o ciardino.
’A coppa ’a muratella, p’ ’o stesso riverbero, nterra,
l’arbere luonghe parevano cchiù luonghe.
’Na pace, ’na bellezza: ’nu suonno liggiero faceva
stennere ’e braccia: ’na serata ’e suspire.
Sentive dint’all’ossa... dicimme... ’na specie ’e stracquezza
ca t’addurmeva, ma nun era stracquezza.
era ’a serata fresca, chell’aria addurosa,
era ’a cicala ca te cantava ’a nonna,
era... nzomma... era maggio! ’o tiempo ca ’o cielo cu’a terra
nascostamente se mettono a fa ’ammore.
Tutto ’o vico durmeva, runfava cchiù d’uno int’e vasce;
manco ’na mosca nun se senteva attuorno.
Ma, dint’a ’nu mumento, rummore ’e feneste e barcune,
’nu trase e ghiesce, s’arapevano ’e porte,
e chi miezo vestuto, chi mmocca a nu vascio, ncammisa,
chi addimannava: « ma a chi ll’hanno purtata? »
Chi cu ’nu scialle ncuollo, p’ ’a pressa, curreva surtanto
c’ ’o suttanino, chi cu ’e scarpune’ ’o pede:
Ch’era succiesso? Niente.-—Sentite, sentite che voce!
quanto fa bello st’accordo ’e panduline! —
diceva ’na figliola cunforme sentette ’a canzona:
Era de maggio, — chi fiorine cchiù stanotte? —
E ’nu viecchio e na vecchia, affacciate ’e rimpetto ’o ciardino,
a uocchie a uocchie, se detteno ’nu vase!...
TRIBUNALE MILITARE.
Iette ’npriggione pe’ ’na cosa ’e niente:
comme sapite, llà... s’attacca a ccurto.
Malato e buono, ’a dint’ ’a nfermaria,
subbeto ’a cella.
E llà, che saccio... se fissaie ’nu poco;
diceva sempe: — Che male aggiu fatto? —
nzi’ ca, ’nu iuorno, se menaie abbascio,
dint’ ’o ciardino.
Comme facette? Scravaccaie ’o muro?
’O ccerto è chesto: se rumpette ’o vraccio;
e ’o culunnello, lla ppe’ lla, mpattaie
ch’era fuggiasco!
’O vi’ cca ’o carro! Povero figliulo!
Otto surdate ca ’e fucile attuorno,
n’ato a cavallo, pe’ chisà scappasse
chillu brigante!
QUATRO ANTICO..
Era guaglione tanno... Comme passa
'o tiempo! E pure m’allicordo buono:
tann’era ’a festa d' ’o mese 'e Maria,
ll'urdemo iuorno.
Quant’era bella chella sacrestia!
fresca, pulita, commeta, ariosa:
che paraviso! Ce steva n’addore
tanto stufuso
e rose e ncienzo, ca pareva overo
’na cosa rara: nnante ’o fenestone,
ll'arbero ’e fiche comme steva bello,
carreco ’e fronne.
Che bellu sole che traseva dinto:
se cunzulava stesso l’assistente,
c’ ’o libro mmano, che capuzziava
ncoppa a ’na seggia;
n’anema ’e seggia ndurata, ’e damasco
giallo; pareva 'na seggia ’e vammana,
’na purtantina, chella d’ ’o seciento,
meza scassata.
Fora, ’int’ ’a chiesa, ll’organo sunava:
a poco 'a vota, tutta ’a sacrestia
se sbacantaie p’ ’a pruggessione
già priparata.
E steva i’ sulo, nzieme cu’assistente
ca, doce doce, s’ ’a facette a suonno:
tanta ’na panza, cu ’a suttana e ’o naso
spuorche ’e liccese.
Stesso guardanno, piglio e mme fissaie
rifaccia a ’nu quatro, ncapo ’o tavulino
d’ ’o parrucchiano, ma nu quatro gruosso,
propeto viecchio,
niro, stracciato, che rappresentava
Giesù risorto: sa vedova ’a tela,
sotto ’a pittura, tutta pertuselle,
tutta smanciata.
E... nun ’o ssaccio, forze ’a fantasia,
o pecchè steva cuieto cuieto,
’addore 'e rose, fissato ca steva,
senza nisciuno,
pe nnanze a ll’uocchie passavano tutte
’e ppasche antiche, tutte chilli tiempe
d'oro e d'argiento, comme fosse stato...
comme a ’nu suonno!
Era ’nu mbruoglio, tanta cose nzieme:
fibbie, spicchiere, merlette, spatine,
perucche ianche; chelli belli facce
d’uommene ’e tanno,
cu ’e fasce 'e seta ncanna pe’ cravatta;
e mme pareva n’ata vota ’o tiempo
d’ ’e mminiature; pare ca vedeva
pure ’o pittore
d’ ’o stesso quatro. Quanno ’a sacrestia
doppo ’nu piezzo se ienchette ’e gente,
e ’o cafettiere priparava ’e ttazze
p’ ’e celebrante,
miezo stunato m’avutaie ’a parte
’e ll’assistente ca, stennenno ’e braccia
e sbadigliammo, sceriava forte
ll’uocchie abbuffate.
Io rummanette comme a chi se sonna
’na bella cosa, proprio naturale,
resideranno pe’ ’nu quarto d’ora
l’ebbreca antica!
A CREMAZIONE.
Hanno fatto ’a paricchio, che saccio, ’na machina, fora,
ca dint’a niente, manco si fosse carta,
se mette’o muorto ’a dinto, po piglia e s’appiccia c’ ’o ffuoco:
che bella cosa, ma che penzata fina!
Ll’osse, ’e capille, ’e ccarne, t’ ’e vvide sparì sott’all’uocchie.
Cheste so ’e cose ca sape fa ’o prugresso?
E ghiatevenne mpace: sta misera pelle che tengo
sotto ’o tturreno se trova assaie cchiù meglio.
Ve mettite paura d’ ’o verme che roseca ’o cuorpo?
Embè... ch’è? forze nun simme tutte vierme?
E po’ so’ vierme nuoste, nisciuno v’ ’e mette ’int’a sacca:
ah, Glolia Pate! cu sta cremazione.
Ma comme, manco ’e muorte lassate sta mpace ’int’ ’e fosse?
Fa male ’a vista pure ’nu campusanto?
Vulite a buonicunte leva pure chisto cunforto?
Manco ’nu sciore, ’na croce, ’na cannela?
Le’ le’; chist’è ’nu sbaglio, ’nu fatto ca nun po ghi ’nnante:
ve pare a vuie ca so penzate bone?
Facitevenne suonno stu tiempo perduto pe’ niente
ca si durmite guaragnate ’a salute.
I' voglio durmì mpace; i’ voglio ’nu fuosso, nu marmo,
llà, mmiezo ’e sciure, mmiezo a ll’erba addurosa
ca nun se secca maie, che cresce e nisciuno l’arracqua:
voglio ’a casata, comme è duvere all’ommo
ca nun è ’nu capretto, ca nasce pe’ ghi’ dint’ ’o furno;
p’ ’e furnacelle cennere nne tenimmo.
Ncoppa a sta terra nfama chest’osse hanno troppo patuto;
e qua’ rispetto sarria a bruciarle pure? !
Date ’o deritto a ’o tiempo, lassate fa ’e ccose’ ’a natura.
Io, ll’osse meie, cunforme so’scavate,
voglio ca stanno azzicco a chelle che m’hanno tenuto
strignute, mpietto, quanno steva ’int’ ’e fasce;
azzicco a chella mana ca ’e llacreme meie asciuttava;
si, pure muorto voglio ca mamma mia
stesse cu nimico, sempe, llà, mpace, addurmuta nfra st’osse
nzieme accucchiate, comme a n’abbraccio eterno!
’O FIGLIO D’ ’A MADONNA..
(Dint’ ’o Stabelimento d’ ’a Nunziata)
Dint’a na sala steva ’na felera
’e criaturelle, piccerille e gruosse,
fine ’e sett’anne, cu ’nu mantesino
nnante, assettate
azzicco azzicco: ma ce ne stev’uno
rissiparato, ca ’o tenette mente
’nu buono piezzo: chillu criaturiello
era ’na pena!
Addimannaie: teneva tre anne,
povero figlio: tantu bello ’e faccia,
tanto cuieto, va sapenno ch’era
ciunco e cecato!
E ll’aggio visto quanno fuie ’a festa
da Nunziata: cu ’na siggiullella,
'na mana appesa, n’ata nzino, e 'a capa
ncoppa a ’nu scanno:
tanto cuieto, pare che durmeva,
ma nun durmeva, steva llà, sul’isso.
Sott'a 'nu muro: dint’ ’a menta soia
forze penzava...
E a chi penzava accussi piccerillo?
penzava ’a mamma? ma che ne sapeva
si sta parola nun l’aveva ntiso
manco pe’ suonno?
Vedeva forze ca pur’isso steva,
p’ ’a mala sciorta, iettato llà dinto?
Ll’uocchie ’e tteneva, ma teneva spaso
comme a ’nu velo,
’na macchia ianca proprio ncopp’ ’o niro:
che nne sapeva? nun sapeva niente;
’o iuorno, 'a notta, sempe ’a stessa cosa:
era cecato!
Chella faccella tanto appuccundrosa
era nu segno! Ll’anema parlava
senza parole dint’ ’o ghianco ’e ll'uocchie...
Povero figlio!
VACCHE E CRAPE..
Tanno schiarava iuorno: ’nu suono confuso ’e campane
’a miezo ’a via, faceva penzà ’o llatte;
faceva penzà ’e ccrape che scenneno nzieme c’o e vacche
e alteramente dànno ogne ghiuorno a ll’ommo
tutta ’a sustanza lloro, fermannese nnante ’e pputeche,
sotto ’e ffeneste, sotto a tanta barcune,
addò ’na mamma acala, pe’ dint’ ’o panaro, ’o bicchiere
c’ ’o soldo ’a dinto, sbruglianno ’a funa longa,
e ’ci masculillo suio, scetannese, aspetta: è ’na festa!
Rireno ll’uocchie nfaccia ’a scumma addurosa
che lle mette salute; po’ doppo, s’addorme
comme a ’na pace... Povero malatiello!
’E ccrape se ne vanno, ma scenneno ancora ati ccrape,
ancora ’e vacche se sentono ’a luntano.
Ah quanto site buone! c’ammore che sento pe’ vuie
quanno ve penzo, care e belle animale!
Che premio avite vuie che tanto facite p’ ’a gente?
scorze ’e mellune, torze e fronne ’e menesta!
’O premio è p’ ’o cavallo pecchè sape correre a ’e ccorze,
pecchè pur’isso fa ’e gioche cu ’e pagliacce:
chillo è cunsiderato, se sape, ’e tutt’ata manera,
e quanno attocca te mena ’o caucio e ’o muorzo!
Che nne vulite vuie? Faciteve spremmere sempe
e passarrate sempe pe’ puverielle.
Sta placatezza vosta, ’sta cosa ca mai ve lagnate
è mparatura, pecchè quase dicite:
« Nu’ mporta: simme nate surtanto pe’ fa bene e zitto,
’e ll’atu riesto nun ce ne preme niente ».
’A BUSCIA.
Ce stanno cierti gente che fanno abbedè comme fosse,
a ll’ati gente, ca dormono: è Buscia.
Chiste so’ chilli tale che vedono ’e ccose a sicondo
cummiene a lloro, sempe pe’ quacche fine.
Po’ ce ne stanno cierte, cu tutto ca stanno scetate,
cu ll’uocchie apierte, dormono ’a vita lloro.
E chisti cca so’ chille che sentono, parlano, e fanno
’e pappavalle, senza penzà ’nu poco,
senza mai di’: sta cosa cammina deritta o va storta?
cunsiderammo, facimmo a senzo nuosto,
gnernò, e pecchè succede ca manco p’ ’a capa te passa
d’ ’a tala cosa? pecche nun te n’adduone?
pecchè? pecchè ’a Buscia se veste ’e nu sacco ’e manere,
te passa nnante, tu guarde e nun ’a vide.
Si tiene ’a vista bona, si staie scetato ’e penziero,
allora credo ca subbeto ’a canusce:
Vide ca zuppecheia, ’na faccia che pare ’na rosa,
chello è russetto, ’na faccia apparicchiata.
Guardannola ’e passaggio, te pare che votta salute,
ma nun è overo: chella è nfettata tutta.
Venimmencenne’ ’o fatto: tu iesce pe’ fa quatte passe
e truove scritto n’anema ’e cartellone:
« Triato tale e tale: Serata di beneficenza
per un artista malato bisognoso ».
Cierti vvote t’ ’o mmucche, te passa ’a Buscia nnante a ll’uocchie
e nun’a vide, manco vide che chella
purtava cummigliata ’na sacca ’e gilè strenta mpietto,
chiena ’e denare, ma no p’ ’o muorto ’e famma,
p’ ’o povero malato: l’artista mureva annascuso
l’affarista taceva ’o fatto suio.
’O iuorno appriesso ’o foglio te schiaffa n’articolo, e chiamma
uommene ’e core quatto mbrugliune ’e ciappa!
Avite visto niente? Gnernò, s’è saputo surtanto
ca ll’hannu fatta ’na bona summetella;
allora, quanno è chesto, vo di’ ch’è passata ’a Buscia,
commetamente, senz’offesa ’e nisciuno;
mettite ’o panno ncoppa, tirateve ’a porta e salute;
quanno è dimane passa pe n’ata cosa!
Attiente sa, ca chella se veste sicondo abbisogna
’a casa soia pare ’nu carnevale!
’na sarturia ’a cchiù meglia nun tene cchiù giuvene d’essa,
e se fatica cu ’a pressa notte e ghiuorno.
Oro, argiento, velluto, livrere, mantielle, vestite,
’na stanza sana tutte cruce e meraglie;
custume belle e fatte che portano scritto vicino
’o nomme lloro; se legge talïano:
Amore, Fratellanza; ’na coppola ’e cuoco, ma nera,
porta stampato: Giustizia, e ’na livrera
porta scritto: Dovere, che ssà... Carità... Mamma mia!
Pare ’a Iudeca... Maschere, castagnelle,
’na frabbica ’e strumente: rancascie, trummune, trummette...
Nzomma, capite... llà se cuncerta ’a vita;
e ll’ommo o è scemo, o pure... fa nfenta ca nun ne capisce!
. . . . . . . . . . . .
PRANZO ’E BENEFICENZA..
Era ’o iuorno ’e Natale. Na folla llà, mmiezo ’o larghetto,
teneva mente chi ieva e chi veneva,
e s’era fatta apposta ’na tavola a cianfa ’e cavallo,
attuorno attuorno tutte bannere e ferze.
Nvopp’ ’o staccato, ’a banda sanava, pe’ dà cchiù alleria,
ll’innia riale: stevano già assettate
quaranta puverielle c’avevano dato ’o buglietto
a ’nu signore cu ’na cuccarda mpietto...
Quaranta allangate: propeto, a termene nuoste:
Cierte, cu ’e panne fracete, venevano...
chisà... p’avè ’nu posto, p’avè quacche meza palata,
pe’ dì: — Guardate, vulimmo sulo ’o ppane!
P’ogge surtanto, nuie vulimmo ’nu muorzo ’e quaccosa
ll’urdema vota, primm’ ’e murì p’ ’a via! —
Ma senza ’nu buglietto, ’nu segno, ’na carta qualunche,
’na canuscenza, comme avive ’o deritto?
E’ na felera ’e gente rummasa llà, fora ’o staccato,
senza speranza, cu ll’uocchie stupetute
e tanto ’e vocca aperta, se steva a sentì chell’addore
d’ ’o ccucenato: ’nu poco ca ’e gguardave
liggive nfaccia a lloro ’e facce d’ ’a mala patenza.
d’ ’a vita ’e cane: ll’uocchie gialle, nfussate;
vedi ve, mmiezo a lloro, perzone cu ’e facce cevile,
facce ’e signure ca... forze tiempo arreto
tenevano ’nu mpieco, tenevano forze astipata
’a cartuscella, chella cu ’e cavallucce!
Embè, accussì cammina stu munno capuoteco e pazzo!
Cu chi t’ ’a piglie? Llate, assettate attuorno,
Senza guardá a nisciuno, tenennese mente nfra lloro,
mieze sturdute, cercavano ’e fa ampressa;
vedive ca ’na vecchia, ntramente magnava. menava
’o mmagnà nzino penzanno ’e figlie, ’a casa,
pecchè chella piatanza vullente e addurosa ’e cunnimma
senza a famiglia...nun le traseva ncuorpo!
Vedive magnà a n’ato cu ’a capa acalata p’ ’o scuorno
e c’ ’o cappiello propeto nnante a l’uocchie,
comme a ’nu mariuoìo c’ha fatto ’na cosa cattiva
e nnanze a ll’ate le sbatte forte ’o core!
Che festa! Che bellezza! Magnate, pezziente affamate!
Che pranzo scicco! ’Na carità ogne tanto
fa bene pure a nuie facenno sunà na rancascia
mmiezo ’e bannere. Nun mporta si dimane
turnate a sta diune. Sentite che musica allera?
ll’innia riale, vivo!... E fernette ’o pranzo.
’ADDUBBATURA.
Apprimma nun ce steva ’stu fatto ’e pavà ’addubbatura,
e ’nu buglietto, quanno purtava scritto
nfaccia: « palco ’e favore»; se sapeva ca nun se pavava,
pecchè pavanno nun è cchiu ’nu favore.
Pure ’nu piccerillo pe’ forza ah da di’ « chesto è giusto; »
e tanta vote te fanno passà a voglia.
’Na vota, ’o palchettaro veneva, te deva ’o cuscino,
tu t’assettave, bello, commetamente,
e cu ’nu pare ’e solde passave ’na bona serata.
Chist’è ’nu fatto: purtave ’na famiglia,
facive ’o signore, nisciuno t’annummenava
st’addubbatura pe’ sentirle ll’opera;
ma mo, all’infuore ’e chesto, che ssà... n’ata lira p’ ’a tassa!
neh, va addimanna che nc’entra ’a tassa mmiezo!
Ched’è? pure ’o triato se penza ca sta’ ’o ministero?
ma ’sti penzate quanno se fanno? ’a notte?...
Tu pave ’a primma lira, ’na lira p’ ’a tassa e so’ doie,
po’ quanno è doppo, meza lira ’a campagna,
e so’ doi lire e meza; scusate, rich’io, ’sta muneta
nun è cchiu meglio c’uno piglia e s’ ’a magna?
È ’na serata fredda, che faie? pienze all’opera? è certo
ca pienze ’e solde; arrunze ’a guagliunera,
mugliereta, ’na sora; te chiamme ’na pizza aglio e uoglio,
nu pare ’e litre, ’nu frutto, che sacc’io...
Nisciuno te secuta; t’appicce ’nu miezo sicarro
e t’ ’o sfezzie: nun pienze ’o guardaporta,
è overo o no? ma è chesto? Levammo ’sta tassa e st’adduobbo,
ca cu ’sti solde... addobbo cchiù ’e ’na panza!...
PUOGGERIALE..
(guardanno ’a coppa a via nova d’ ’o Campo)
Mme pare, all’uocchie mieie, ’nu grande tappeto ’e verdumma,
’nu mare verde che dorme stiso nterra;
e tutte chelli ccase che stanno mmiscate p’ ’o miezo,
chelli ppagliare cu chelli stratulelle,
’e valluncielle d’acqua che scorrono mmiezo’a campagna,
’o mare, ’o cielo, chella muntagna ’e fronte,
mme pare ’na pittura, mme pare ’na scena ’e triato,
’na cosa scicca: tu guarde e a poco ’a vota,
senza ca te n’adduone, p’ ’a stessa bellezza d’ ’a vista
che tiene nnante, te siente stunà ll’uocchie.
Sulo quacche auciello se sente p’ ’a strata sulagna;
ma, tutto nzieme, ’nu sisco forte forte,
atrunanno dint’ ’e rrecchie, te sceta. Che zumpo! T’avuote
e vide ’o treno: ll’irea ’e nu serpente
niro che fummechea, scappanno pe’ coppa a chell’erba,
cu ’a gente ncuorpo: sisca, ma è già scuparzo.
Ll’urdemo raggio ’e sole se stenne p’ ’e ccase luntane
quanta culure! quanta bellezza ’e luce!
Ogne fenesta pare ’nu sole, che ssa’... ’nu biancale!
e cierti lastre pareno ’e matrapperla.
Che bello rrusso ’e sera, che fuoco, che nuvole d’oro,
che cielo; comme more bella ’a iurnata!
Tenenno mente, abbiste ’na casa, ’na strata, ’nu sito
ca t’allicorda quann’ire piccerillo,
quann’ire cchiù felice, quaccosa d’ ’e tiempe passate,
quanno teniste tu pure pate e mamma!
Ma tutto se fa scuro; ’o sole, ammancanno ammancanno,
già se n’è sciso: abbascio ’a chiesa ’o Pianto
sonano ’Avummaria: ’nu carro c’ ’o muorto passanno
ncopp’ ’o bbricciamme te fa avutà, e tu guarde,
e pienze ca cchiù nnante ce sta quaeche cosa d’ ’o ttuio!
Ce sta ’nu marmo, ’na croce. ’na curona...
E..... ’a mana va truvanno, pe’ dint’ ’a na sacca qualunche,
muccaturo!.........
'O CARMENE.
È mezanotte mpunto: vicino ’a fenesta assettato,
guardo ’o ciardino che pare n’ombra nera.
’Nu muorzo d’aria fresca mme passa p’ ’a faccia, addurosa
d’erba, che pare ’na mana c’accarezza.
Già stammo a’ mmità ’e luglio: che bello silenzio a chest’ora!
E suspiranno forte, e stennenno ’e braccia
sento sunà ’a lontano, cupa cupa, ’na bella campana.
Ess’è, ’a canosco! Mme pare che dicesse
a Napole. che dorme, ’nu munno ’e parole secrete,
comme cantasse ll’antica storia soia!
Quanta e quanta penziere mme passano a ffila p’ ’a mente!
Dimane è ’a festa; ma chi ne parla ’e chesto?
Qua’ festa? chi ce penza? ’Na lacrema sola mme scippa
chella campana che parla a ’o core mio:
’na lacrema sincera che scenne appannanneme ll’uocchie,
e penzo ’a sciorta c’avette Masaniello!
MUSICA.
Quanno se nasce se fanno ’e festine;
venene ’e suone, veneno ’e cantante,
e alleramente se passa ’a serata
sempe sunanno.
Pure ’e guagliune, tutte ’e lazzarielle
che manco sanno che vo di’ San Carlo,
tanto d’ ’a gioia, fanno ’e capriole
nnante ’o surdate,
pecchè ’a rancascia, chelli tromme forte,
chilli trummune, fanno n’alleria,
ca ’e guagliuncielle nun ’o ssanno manco
comme succede.
Dint’ ’a nu vascio, dint’ ’a ’na cantina,
siente ca sona quacche pandulino?
quacche chitarra? guarda mmocca ’a porta
quanta ncantate!
Passe cchiù nnante: dint’ ’a chillu vico,
ch’è spuorco o stritto, nce hannu fatta ’a festa;
sona ’na banda? guarda quanta gente
teneno mente!
Figliulo o viecchio, staie disperato?
staie forze affritto pe’ ’nu fatto tuio
e vaie parlanno sulo, comme a pazzo?
ch’è? ce vo’ tanto?
Mmocchete dinto a chella birraria,
addò se sona: si nun tiene ’e solde,
t’ ’o ssiente ’a fora, sempe è ’a stessa cosa,
basta ca siente.
Nce stanno cose ca nun fanno effetto,
comme ’o sceruppo, ll’acqua turriacale,
ma quanno siente musica, va, curre,
tutto te passa.
Musica bella! Sola tu mme rieste,
tu nun me lasse manco quanno moro,
e m’accumpagne pe’ ll’urdema vota
quase chiagnenno.
Nun si’ cchiù allera, ma, certo, si’ sempe
musica, e pure ncopp’ ’o campusanto,
’na vota a ll’anno, ll’organo mme dice:
Requiammaterna!...
’O CUNTATORE..
Quanno 'e tteròcciole sempe avutavano,
cu chillu lièpoto seccante e nzipeto,
e zerriavano, anze chiagnevano
p’ ’a sciorta lloro barbara,
era ’nu lotano, ’nu grande ncommeto;
t'aviv’appennere, t’aviv’a stennere,
mo nun vutavano, mo ntruppecavano,
e ’a funa t ’’a struievano.
Po’ se scassavano cate a bizzeffie,
e chirchie e maneche se ne venevano
pesole pesole; quann’era all’urdemo
manco putive vevere...
’E ffune fracete, cu chilli nureche,
mo se nchiummavano, mo se rumpevano,
e ’o cato ’e furia scappava subbeto
e te faceva sbattere.
Ll’acqua era libbera, nun ’a pavavemo,
ma ce cadevano muscille, zoccole,
anze ’o pericolo era assaie facele,
pe' passà 'na risgrazia.
Ma po’ ciert’uommene, gente ’e iuricio,
cu chelli solete penzate mascole,
sturianno Napole, llà llà dicetteno:
« Va buo', ll’avimmo sceveta! »
E ce mettetteno ’na specie ’e bussola,
che ssa’... ’na machina che conta ’a veppeta,
cu cierti nummere, cu cierti lettere
ca lloro s’ ’e ccapisceno.
Cierte mm’accocchiano ca sola ’America
te fa miracole, ma ch’è? ll’Italia
che fosse cevoza? nu’ state a sentere,
’o cuntatore è l’unico.
Mo nun è l’ebbreca ca truove ’e stupete:
ll’acqua, spiegammoce, si s’ha da vevere
nce vo ’na regola, senza fa chiacchiere;
tann’erano ati secole.
E accussi, ttaffete, penzanno ’e mettere,
pe’ benefizio, ’stu grande commeto,
onore e gloria d’ ’o municipio,
facetteno ’o servizio!
’A PICCIULITÀ..
’E surdatielle, scuppette, sciabbole,
carta ndurata, trummette, strommole,
stutale, muzzune ’e cannele,
ardarine, quatrille, cumete.
Colla e puntine, ’nu ricienteseme,
pupe, pasture, scene, presebbie,
chibbi, cavallucce ’e cartone,
cunfettielle, surbetta, taralle...
Ch’aità felice! Nun ne capisceno
niente d’ ’a vita ca nun canosceno!
So’ ancora nnucente. Che sanno
quanto costa a campa ’na famiglia?
Nun sanno ancora quanto hann’ ’a chiagnere!
Che morza amare s’hanno c’ ’o ccrescere,
’sti povere figlie nnucente
ca so’ ’a cosa cchiù bella, cchiù cara.
Quanta mardratte pe’ quacche nziria,
quanta mazzate si so ncrapicciano.
Pe’ mezzo ca sferra ’a pacienza
’e ffacite nfelice cchiù ampressa.
Nun ’e bbattite: ah, cumpatitele:
so’ piccerille; quanno addeventano
cchiù gruosse penzato ca pure
vanno incontro a patenze cchiù grosse.
Io cierti vvote penzo, cutisidero
ca quante e quante, pe’ ’na risgrazia,
ancora guaglione tantille,
pe’ sfurtuna, se trovano prive
d’ ’o pate e ’a mamma, e tanno ’e llacreme
nisciuno ’asciutta, anze è difficele
truvà chi t’aiuta e ’sti tiempe:
chi te spia: tiene famma? vuò pane?
E quante ’e lloro spisso fernesceno
mmiezo a ’na strata, sotto a ’na cchiesia,
e dormono nterra, iettate,
comme fosseno ’o scarto d’ ’a carne!
Ah! quanta vote ncoppa a ’nu marmolo
na capa bionda, bella, ’na loppeca
vedite, llà, mmiezo ‘e ppetacce.
cu ’a cascetta ’e cerine a ’nu lato.
Dorme, riposa, penzate subbeto:
Quant’è carillo! Che faccia d’angelo!
E l’angelo tanno se sonna
forze ’a mamma ca sta ’nparaviso!
Che suonno forte, ma va ’nu guardia
e cu ’nu pede piglia e ’o fa sosere:
— Nce siente vattenne ’a cca nterra?
N’ata vota ’e scorea chill’uocchie!
Chesto che dico, spisso ’na storia:
quante nfra chille nun s’allicordano
na’ mamma, ’na casa, ’nu lietto,
e ’na lacrima scenne pe faccia!
Quann’uno è gruosso se sape movere,
’o mmale e ’o bene se po canoscere,
ma quanno ’o lassate tantillo
resta comme a ’nu cane sperduto.
Tenite mente comme ce guardano;
pare che sempe, sempe cercasseno
ammore, carizze, vasille;
nun ce ponno vedé ntussecate.
Mo simmo ’o fatto: lloro se credono
ca tutto ’o munno facesse ’a birbia,
ca ognuno è cuntento e penzasse
tutto chello che penzano lloro.
’E surdatielle, scuppetre, sciabbole,
carta ndurata, trummette, strommole,
stutale, mezzune ’e cannele,
ardarine, quatrille, cumete...
Nun ’e battite; ah, cumpatitele:
so’ piccerille; quanno addeventano
cchiù gruosse penzate ca pure
vanno incontro a patenze cchiù grosse.
’O GUARDAPURTONE..
Sotto ’o palazzo, luongo luongo, all’erta,
cu ’e mane a croce ncopp’ ’o pumo ’attone,
guarda ’o bastone cu ’nu fiocco mponta,
bello pesante.
Tanta ’na varva, nu suprabbetone
anzino ’e piede, tutto abbuttunato,
’e guante ’e mane, senza fa ’na mossa,
pare ’e lignamme!
E sta llà sotto pe’ fa ’a sentinella,
nnante ’o palazzo cu ’na mpresa ’a fora,
pecchè ’e patrune ca so’ titulate
pavano apposta.
Chi passa e ’o guarda, dice: — Ma ch’è chillo?
capetammurro? che mme rappresenta?
ma chillo penza: quanno è ’a fine ’o mese
corre ’a mesata.
’Nu piezzo d’ommo ca farria a mmazzate,
chino ’e salute, ’na faccia ’na rosa,
putesse overo faticà pe’ quatto,
ha da fa’ ’a mazza!
Ato che chesto se la p’ ’a campata!
Se perde ’o scuorno, se perde ’o cuntegno:
n’ommo se ietta comme vonno ll’ate,
basta ca magna.
E si dicite: — Chesta è ’na palata,
portela a ’e figlie, ma di’ ca si ciuccio,
arraglia — chillo porta ’o ppane astrinto
sotto, arraglianno!
Po vaie ’o triato? pe’ vedè che
pe’ vedè ’o fatto c’hanno cuncertato?
ll’opera è chesta ca se fa ogne ghuorno,
senza’o buglietto!
TUOSSECO.
Va, va, vettenne, mo cu quatte lacreme
crido ’e mme fa capace o ’e farme specie...
Te tengo scanagliata: cu ’stu liepeto
vuò fa messere a me che songo pratteco
e ’sti ssunate toie accussi tennere?
No, pigliatelle teh, chesto so’ ’e lettere;
’aniello d’oro sta dinto a ’stu scatolo
nzieme c’ ’o muccaturo, ’a spilla e ’o pettene.
Pare ca mo... songo fernute ’e cchiacchiere,
nun c’è bisogno ca facite ll’opera
e seguitate a di’ ca so’ ’nu ietteco,
Già ca ve site mise cu ’e sciammerie,
mo putite parla cu don Eugenio,
noi non potiamo ave ll’annore, ’a razia
’e fa chiù ’ammore, mo nce vo, cu ’e ffemmene
ca songo restinate, p’ ’e cap’uommene...
Embè... nun c’è che fa, v’avite sciveto
sicondo ’o sintimento e... comme è regola;
ma i’ m’ ’o magnasse, sango d’ ’a miseria,
comme a ’stu dito mio, accussi, pe’ sfizio!
Ch’è stato? Nun tremmate... passa subbeto,
’nu poco ’e sango, è niente, ’assat’ ’o scorrere.
Nfame! birbante! Femmena senz’anema!
Vicienzo Sica te faceva ncommeto!?
Mo t’è luvato ’a nanze chistu loteno,
’stu guaio ’e notte, chistu cataplasemo
te ll’è luvato ’a coppa ’a vocca’ ’o stommeco
Se sape chesto; era seccante ’a storia.
Zitta: nun fa’ ’sti giuramente fauze!
E tu si, chella ca te siente ’a prereca?
ca toe cunfiesse? ma cu che cuscienzia?
e tiene ’o core ’e cuffia ’nu prevete?
Siente, si chella Mamma mine fa ’a razia,
chistu peccato, oi’ nè, t’’ha da fa chiagnere.
Si iesce prena, l’aggio ’avè ’a nutizia!..
Accia cantà llà, sotto a ll’Incurabbele!..
'O VICO D’ 'E CCANNELE..
È scuro e luongo: ’nu fanale appicciano
a ’nu puntone e n’auto
a ll'ata via. Dint’a stu vico sbeteco,
’nu cane sempe roseca.
Ce sta nu tanfo ca te tocca ’o stommeco,
’na muffa ch’è mpussibbele
'e sta affacciato pe nu muorzo d’aria...
E c’aria? Llà è ’na chiaveca!
'Nu vico muorto; ma è ’nu bello commeto
p' 'e nnammurate scuonceche,
p' 'e cantature ch’hanno ’a fa ’o riverbio
addò sta ’o ssulitario.
Nchiuvato dint’ ’o muro, pe’ disgrazia,
'a che hanno mise ntridece,
’nu San Giuseppe, cu ’na faccia ’e tuosseco,
ne sta agliuttenno pinnole!
E tutte ’e notte sempe ’a stessa storia;
chi ’o po dà tuorto? — E cancaro —
— dice — ’o lucigno ’e chesta lampa ietteca
serve pe’ me o pe’ ll’aute?...
E appena trase abbrile può fa’ n’opera,
’o sito è bello e sciveto,
’o vico tene affare, e... tutto è sfizio;
se po nzerrà ’o niozio?
Nu vase, ’na iastemma, ’nu silenzio,
rummore ’e tacche, appicceche;
po... ’nu ciù ciù, ’nu giuramento, e subbeto
nient’ato siente. ’Nu zifero
’e viento passa mprufumanno ll’aria.
Ma ’o vico è spuorco?... È inutele...
‘E sciure ’arance sonco ’e sciure ’e ll’anema,
ah! beneditto Napole!...
PASSANNO ’E SURDATE.
'E bbi’ cca: tornano. Che poco ’e pòvere!
Guardate: ’a teneno ncrastata a rotole!
Sfatte, stunate ’e sole,
nun saccio chi mme pareno.
Eccoce, subbeto tutte s’affacciano
a sentì, ’o ssoleto, chello che sonano.
So’ ghiute ncopp’ ’o Campo
da ’e quatto a fa’ ’e sarcizie!
’E piede, caspita, sa’ comme ’abbruciano!
Ato che chiacchiere. Seh, seh, accurdatele
c’ ’o ncinna nnànna ncinna...
Sa’ comme se cunzolano!
’O sole, ’o cauro, te siente ’o pisemo
ncuollo d’ ’o zaino che le fa scorrere
chillu surore ’e morte,
e cierte se ne veneno
ca songo giuvene, se cevelizzano,
e ca ’e cchiù stupete llà se fanno uommene,
c’hanno rî solde ’o iuorno
e girano ll’Italia;
anze se mparano comme s’accidono
’e figlie ’e ll’aute: e s’ha da credere
ca chillo so’ ’e nemice,
nun già chi ha dato ll’ordene.
E p’ogne piccula mancanza ’e regola,
pe’ nu sfastirio, qualunque inezia,
te mmoccano mprigione
e duorme ncoppa ’e ttavole.
Hai’ voglia e chiagnere penzanno a mammeta,
penzano a ll’ebbreca quann’ire libero!
O muore o te staie zitto,
llà nun ce sta remmerio!
Si pe’ disgrazia o Caio o Tizio
p’ ’a troppa collera se ne va ’e mmummara
e fa ’nu buonu guaio,
doppo fernuta ’a causa,
iesce ’a sentenzia, senza fa’ storie,
a mmorte, subbeto, comme a’ nu piecoro!
E fosse niente chesto!
Chi 'o ssape si te chiammano,
si t’hanno sciveto, mmiezo a tant’aute,
si te cumannano, c’ ’o segno ’e sciabbola,
d’accidere ’o cumpagno?
Chillo nun è micirio.
s’ha da’ fa ’o stommaco: chest’è ’a milizia;
’e iuorne passano, passa ’o pericolo;
nce vo’ sempe ’a livrera...
’a libertà è ’na chiacchiera.
Nce vo’ pacienzia pecchè penzannece
te vene ’e dicere: manco pe’ polece,
dint’ ’a cammisa vosta!
Io nne muresse fraceto!...
Iammo: affacciateve, currite a sentere
’a capa musica! Seh seh, accurdatele
c’ ’o ncinna nnànna ncinna!
Sa’ comme se cunzolano!..
’O IUORNO ’E PASCA..
E cu salute: comme ll’îte vista
st’anno ’a puzzate vedè pe’ cient’anne.
Se so’ sciugliute già tutte ’e ccampane,
’ngloria d’ ’o Cielo.
E tengo ancora nnante all’uocchie mieie
tutta ’apparata ca s’è fatto st’anno
d’ ’o mmagnà ’e Pasca, comme se fa sempe
fora ’e pputeche
d’ ’e casadduoglie, d’ ’e meglie chianchiere
cantine nove, magazzine ’e pasta...
che bella cosa, che scicchezza ’e robba,
quanta ricchezza!
Quant’abbunnanza rimasta comm’era,
llà, tale e quale, pe’ mancanza ’e solde!
’Izate ’a voce, meh, gente, alluccate
forte: Alleluia!
Quanno trasenno zi’ provate nuosto
benedicette tutta ’a casa: allora
avimmo miso suspiranno ’o soldo
dint’ ’o catillo,
e mentre asceva nzieme c’ ’o pecuozzo
dicenno a tutte quante: — Buona Pasqua! —
ll’aggio guardato cu ’e braccia chïate
nzi’ ch’è scunparso,
e aggio penzato: quanta bona gente
mettono ’o soldo cu ’a speranza ’o core!
Ma è ’nu destino: ’ll’acqua santa e ’a parma
mai fanno niente;
Resta ’a speranza, ma speranno sempe
a poco ’a vota tutte nce ne iammo,
e tutte ’e cose ’e chesta vita nfama
restano ’o stesso.
Ogge chi scippa, chi afferra ’a campata,
se guarda attuorno pe’ chisà lle sfuie,
pecchè chi campa nu’ sta maie sicuro,
tutto fallesce.
Munno busciardo, fauzo, traditore:
te vene meno stesso ’o sango tuio;
tutto ’e denare! denare, denare,
sempe denare!
sinò si’ muorto. Ma ponzammo a Pasca:
nzi’ ca c’esiste ’nu bicchiere ’e vino
vevimmencillo. Vuò penzà... che cosa?
pienze dimane.
Ogge se campa, dimane se more;
e bona Pasca, comme dico a vuie,
dico a me pure. Bona ge’, alluccate
forte: Alleluia!
LICENZIATA.
Ve saluto, bona gente,
finalmente
aggiu fatto ’a prima rima:
se capeva, se sapeva,
nce vuleva,
cca nisciuno ’a leva ’a stima.
Meh, faciteve ’na panza
d’assunanza,
pecchè po sarria n’abuso,
doppo ditto e doppo scritto
p’ ’o dderitto,
tutto nzieme a levà ll’uso.
Cca se parla in asse e in isso
tantu spisso:
fosse pure ’nu guaglione,
ce scummetto, pe’ diletto,
fa ’o sunetto,
e ve fa pare ’e ccanzone.
Ogne tanto ’na parlata,
’na sfucata
nce vo’ sempe, chesto è giusto;
nun dicimmo, nun vulimmo
nè ntennimmo
ca fernesse st’atu gusto.
Vuò fa ’a rima? chi te tene?
chella vene
mponta ’a lengua a tutte quante.
Sotto a Cicco scrive micco?
fa cchiù scicco
pecchè a rima e ’nu brillante!
’E pparole? so’ tturchine,
prete fine
ca se ncrastano cu ’e punte:
ma cu tutto stu ccustrutto
bello o brutto,
truove sempe poche accunte.
Si nun tiene ’a lira ’a pparte
mo faie ll’arte!
Miette ’o lietto sotto ’e stelle.
Acre o doce, dice ’a voce.
Chest’è ’a croce!
Tiene ’e prete? e magnatelle!
Ca tu ncraste, accuonce e scraste,
pure ’e maste
canusciute ’int’ ’o mestiere,
vota e gira, fanno ’a mmira
pe’ ’na lira,
proprio peggio d’ ’e cucchiere!
Comme ’avuote e comme ’a smierze,
quanta vierze
che sacc’io... buone ncrastate,
quanno ’e ffaie, neh, che nn’aie?
sempe guaie!
Ma po’ quanno so’ passate
tutte ’e guaie, resta ’a gnosta
fatta apposta
pe’ dà sfoco a ’e patimente,
e, o p’ammore o pe’ dulore
chillo... ’o core
trova ’a rima dint’a niente.
Ve saluto, bona gente:
finalmente
pozzo di’ ca penzo a vuie,
ca ’nu tierzo d’ogne vierzo
iarrà spierzo
pecchè tutto cagna e fuie!
A te, bella signurina,
ianca e fina,
pozzo di’ cchiù franco e tunno:
Gioia mia, faciarria
’na puisia
c’abbracciasse tutto ’o munno!
’Na puisia ca smuvesse,
ca dicesse...
tutto chello che penz’io!
Ma ca i’ sbatto e ca cumbatto?!..
tutto è fatto,
te saluto e dico: addio.