Notte
MENOTTI BIANCHI
Notte.
SCENE DRAMMATICHE IN UN ATTO
Traduzione dialettale napoletana di R. Chiurazzi
Edoardo Chiurazzi
LIBRAIO EDITORE
— NAPOLI — PIAZZA
CAVOUR 13 — — —
PERSONAGGI
aniello
donn’ amalia
cuncetta
peppeniello
rusella
taniello
carmeniello
nunziatina
furturella
assunta
gnesella
vito
tore
biase
mimì
due guardie di p. s.
SCENA II.
Due guardie di P. S., Peppeniello e D. Amalia
Due guardie di P.S., con l’impermeabile, attraversano la via, dalla sinistra alla destra, con passo cadenzato, uguale. Poco dopo, dal basso di Aniello esce di corsa Peppeniello. D. Amalia immediatamente appare sulla soglia del basso e lo chiama.
D. Amalia. Aspè, Peppeniè!… Pigliete ’o mbrello, ca sta chiuvenno.
Peppeniello. Che ghiate penzanno! Io vaco e vengo!… (Fa per correre).
Amalia. E siente!… Doppo ca ’e chiammato ’o santissemo a’ parrocchia, accatte duie cannelotte a du don Andrea. (Si asciuga una lagrima). Te’: ’e quatto sorde.
Peppeniello. E nun sarriano bone ’e doie cannele d’ ’a Cannelora, ca stanno appese a ’o lietto?…
Amalia. Siente a me: accatte ’e cannelotte e viene ampresso.
Peppeniello. Duie minute e sto’ cca!…
SCENA III.
D. Amalia e Concetta
Concetta. (esce dal basso e si avvicina a D. Amalia, che piange, appoggiata con le braccia allo stipite della porta). Donn’Ama’, Aniello ve vò.
D. Amalia ’O vedite cca!… (Si asciuga gli occhi). È Dio, siè Cuncetta mia, ca accussì vo’!… N’aggio fatto priarie, n’aggio mannate messe all’aneme pezzentelle…. Niente! Niente!…..
Concetta Vuluntà ’e Dio!… Segno ca accussì era destinato, Donn’Amà!…..
D. Amalia Parlate bello, parlate!… Mm’è figlio!..
Concetta É giusto, e specialmente Aniello, pe essere troppo nu buono giovene, s’è arredutto accussì. Avite visto che smania tene stasera?
D. Amalia Siè Cuncè, io so’ mamma, e nun mme nganno. Chi sa’ si figliemo ’a tira anfino a dimane!… Me l’hanno acciso, me l’hanno!…
Concetta Veditene ’a fine, ’onn’Amalia mia. L’hanno ’a chiagnere a lagrime ’e sanghe chello c’hanno fatto a chillu guaglione!
D. Amalia (singhiozza) Ah! Io nun me ne scurdarraggio maie e po’ maie ’e chillo figlio!… Che core, siè Cuncè, che core!… Ha perdunato a tutte chille che l’hanno fatto male. L’avite sentuto?
Concetta E vuie pure, avite ’a perdunà.
D. Amalia (con scatto) Io no!… Maie, maie!… Me n’aggia vevere ’o sanghe ’e chella scellerata, me n’aggia vevere!…
Concetta ’Onn’Amà, dich’io, pecchè va pigliate tanto cu chella povera scunzulata?
D. Amalia ’A difennite?…
Concetta No, ca nun ’a difenno; ma l’avisseve ’a vedè comme è arredotta… Chiagne matina e sera, e propio ogge m’ha ditto ca vuleva venì cca pe se menà ’e piede d’Aniello.
D. Amalia Chesto ha da fà!… Se pruvasse!…
Concetta Io, però, ce l’aggio scunzigliato.
D. Amalia Avite fatto buono!… Nun saccio comme le sarria venuta.
Aniello (d. d.) Aiutateme!… Mo moro!… Oi’ ma’!… (Le due donne si precipitano nel basso).
SCENA IV.
Peppeniello e Concetta
Peppeniello (arriva di tutta corsa e grida) Siè Cuncè!… (Concetta esce dal basso) Sta venenno ’o santissemo!… È ’o sottaparroco in persona…
Concetta Peppeniè, fallo trasì p’’o palazzo. (Fa per rientrare nel basso).
Peppeniello ’E vulite ’e cannelotte?…
Concetta Appiccele tu stesso nnanze a Giesù Cristo. (Indica il Calvario)
Peppeniello Tenite nu fiammifero?…
Concetta Aspè!.. (Rientra nel basso, mentre Peppeniello aggiusta i ceri innanzi al Calvario. Riesce e dice al ragazzo) Peppeniè, te’.
Peppeniello Va bene accussì?… É schiuòppeto.
Concetta (con le mani giunte in atto di preghiera). Ah! Giesù Crì, fance ’a grazia!… (Rientra nel basso. Il Viatico, non visto, è entrato in casa di Aniello. Si ode il tintinnio del campanello; una luce viva di candele e di frasche accese risplende nella via. Assunta appare sulla loggetta alla destra del calvario con un lume acceso, che depone sul parapetto; poi si inginocchia e prega. Nunziatina, Furturella e Gnesella escono dalla destra, si fermano e s’inginocchiano dinanzi al basso di Aniello… Così pure Vito, Tore, Biagio e Mimì, i quali con devozione si curvano e si tolgono il berretto. La pioggia è cessata. Si sente il pianto di Donna Amalia e il campanello del Viatico che si allontana nella notte oscura. Il basso di Aniello resta nella oscurità. Le donne si alzano, gli uomini si rimettono il berretto. Assunta toglie il lume dal balcone e rientra.)
SCENA V.
Detti, Taniello e Carmeniello.
Taniello (all’amico) S’ha fatto pure ’e sacramente, ’e visto?… Povero Aniello!
Carminiello Te dico a te ca me dispiace assaie… Era nu bravo amico.
Taniello. Ch’aggia dì?… È stata colpa mia? Che ne putevo sapè!…
Carmeniello. Colpa toia?… E pecchè?… Segno ch’aveva succedere accussì.
Taniello. Chi ’o ssape? Forse sarria stato meglio si nun l’avesse ditto ’a verità.
Furturella. (alle donne che la circondono). Cca nun se ne capisce niente, pecchè chi ’a conta cotta e chi ’a conta cruda.
Gnesella. ’O certo è ca Aniello, a comme se dice, ha pigliato sta scippa-centrella pe mezzo d’’a nnammurata…
Taniello. (a Carmeniello) Che stanno dicenno?…
Carmeniello. Parlano ’e te… So’ femmene, se sape……
Taniello. E che diceno?
Carmeniello. Ch’hanno ’a dicere?… Nun se sape?… ’E ssòlete chiacchiere.
Taniello. Tutte contro a me, ’o saccio; aggio tuorto; si nun avesse parlato sarria stato meglio.
Carmeniello. Chesto po’ no; anze sarria stato peggio, siente a me… Aniello t’era amico…
Taniello. Ma io ’o voglio vedè pe l’urdema vota… lle voglio parlà pe’ chiarì tutte cose pe rimorso ’e coscienza.
Carmeniello. Si’ pazzo?… Chillo sta ’e chella manera!
Taniello. Io l’aggia parlà!…
Carmeniello. Taniè, penza a’salute…
Taniello. Tu parle buono. Ma io nun me pozzo dà pace… Ma comme, era na bella cosa si lle faceva sposà chella femmena ca io…? E l’amicizia, allora?… e l’onestà?…
Carmeniello. Ma, dico i’, tu nun ce ’o putive avvertì primma?…
Taniello. Primma?… Ma isso me n’à fatto sempe nu mistero d’’o bene ca vuleva a Rusella.
Carmeniello. E Rusella?…
Taniello. Pure ’o stesso. È femmena… e quanno cchiù ’e na vota ce l’aggio addimannato, se l’ha anniato sempe…
Carmeniello. Che busciarda, Assassina!…
SCENA VI.
Detti e Assunta.
Assunta (al gruppo che parla in fondo sottovoce) Guè, state facenno suggità?… Chi veco! Furturella, Gnesella, e pure vuie, Don Vito?… Bravo! Simmo tutte d’’e nostre!
D. Vito. Me so’ truvato a passà ’a cca, e me so’ fermato pe’ vedè addò ieva Giesù Cristo.
Forturella (ad Assunta) Assù, ’e visto?…
Assunta. É nu sparpetuo, Furturella mia!… Io sola saccio chello ca passa ogne notte chella povera donn’Amalia, ca p’ ’a malatia d’’o figlio s’ha levato anfino ’e chiuove d’’a casa.
D. Vito. Povera femmena!… E isso, povero guaglione, che ha appezzato ’a pelle!…
Forturella. Don Vi, ’o canusciveve?…
D. Vito. Comme! Eremo amice.
Tore. Mannaggia ’e ffemmene e chi ’e ccrede!… Se ne pozza perdere ’a semmenta!…
Gnesella. Schiavo ’o scellenza! Vuie ate uommene pure site na bella mercanzia…
Assunta. Aspé! Si vulimmo, ave ragione Tore: nun è sempe pe’ causa vosta ca succedono tanta guaie?…
Biase. Se capisce!
Mimì. ’A verità, Aniello ne puteva fa’ a meno ’e ne piglià na malatia… Nun ce steveno cchiù femmene a Napule?…
D. Vito. E già! ’O ragiunamento d’’o ciuccio!…
Mimì. Pecchè?…
D. Vito. Pecchè è bello chello ca ’o core piace… E a Aniello le piaceva Russella, e ’a vuleva overamente bene.
Assunta. Comme no!… L’avisseve avuto ’a vedè quanno Aniello sapette ca Rusella era stata disgraziata…..
Biase. E chi ce ’o dicette?…
Assunta. Chillo stesso ca aveva fatto ’o guaio.
Gnesella. Che nfamità!… E vuie ’a cunuscite a sta Rusella?…
Assunta. Comme!… Nun disprezzano, è na bella figliola overo…..
Mimì. E ch’arta faceva?… Assunta. ’A cazettara.
Gnesella. Arta liggiera!…
Taniello. ’E ssiente quante ne stanno dicenno?..
Carmeniello. Lassa ’e dì, che te ne mporta!… A stu paese, ’e ’a penzà na cosa, accussì s’ausa… ’O cetrangolo spremmuto ce se dà nu caucio ’a coppa…
Taniello. (trattenuto da Carmeniello). Ma io…
Carmeniello. Ch’ ’e perzo ’a capa?… Lassa ’e dì!… (Taniello parla concitato con l’amico).
Gnesella. (ad Assunta) E vulite fernì ’e ce cuntà ’o fatto?…
Assunta. Sempe pe sentì dì, sora mia, ca po’ ’a verità ’a sape Dio!…
Nunziatina. E dicite chello che sapite.
Assunta. Sempe ’a stessa storia! Nu giovane chiammato Taniello, tanto tiempo fa, faceva ’ammore cu Rusella e, comme succede spisso e vulentiere, sta povera figliola cadette… Vuie mme capite… ’E prumesse d’ ’o nammurato…… Po’, ncapo a na settimana, fuie abbandunata.
Nunziatina. L’uommene fanno tutte accussì!
Gnesella. Faccio buono i’, ca ’e faccio spantecà!…
Assunta. Rusella, però, nun se perdette ’e curaggio, e doppo poco tiempo se truvaie Aniello, ca se n’annammuraie comme a nu pazzo.
Mimì. Mo’ accumencio a capì, ’o bi’!…
Assunta. Sempe comme m’hanno cuntato, diceno ca stu Taniello, quanno appuraie ca l’amico suio Aniello, s’era miso cu Rusella e ca s’’a vuleva spusà, se dichiaraie su dui’ piede, e sbelette tutto ’o fatto. Avite capito?… Ora mo, nun se sape si ’o facette pe’ gelusia, o pe nun tradì l’amicizia d’ ’o compagno.
D. Vito. O l’uno o l’ato, facette na mala azione!……
Carmeniello. (a Taniello) Taniè, jammuncenne…
Taniello (a Don Vito). E pecchè, si è lecito, facette na mala azione?…
D. Vito (sorpreso, guarda Taniello) Sentite: io nun saccio… ma ad ogni modo ve dico ca s’aveva ’a sta’ zitto.
Taniello. A lengua vosta, venea di’ ca l’aveva fa’ scemo?…
Assunta. Giuvinò, scusate, ma vuie chi site?…
Taniello. Song’uno ca sape tutte ’e particulare ’e sta storia sfortunata!…
Carmeniello. (sottovoce) Statte zitto, Taniè… Ma che vuò fa’?
Gnesella. E allora cuntatincella vuie.
Taniello. (risoluto) Sì, ca v’ ’a conto, e ve dico ca Taniello se cumpurtaie onestamente, quanno a tiempo arapette l’uocchie a l’amico suio cchiù caro e affezionato.
Carmeniello (tira l’amico per un braccio). ’A vuò fenì o no?…
Assunta. Lassate ’o parlà, giuvinò!…
D. Vito. Ammeno se chiarisceno ’e ccose.
Gnesella. Na vota ca ce truvammo mo…
Taniello. Aniello, giovane onesto e faticatore, nun se puteva spusà Rusella, e st’amico, ca ’o vuleva bene assaie, sarria stato nu nfame se nun ce l’avesse avvertito.
D. Vito. Ma Aniello nun ’o credette… Pecchè?…
Taniello. Pecchè a stu munno scellarato sempe accussì succede… Aniello, p’ ’o troppo bene ca vuleva a Rusella, credette ca l’avevano cacciata na calunnia: e po’, essa giuraie e scongiuraie ca nun era overo…
Assunta. Puverella!…
Biase. Ve vulite fa’ nu nemico? Dicite ’a verità.
Mimì. Sì, accussì è…
Tore. E Rusella?… Pur essa puverella, c’aveva ’a fa’? Puteva cunfessà a ll’ommo ca vuleva bene tutte cose? « Io t’aggio ’ngannato»… E’ na parola!…
Gnesella. Forse sarria stato meglio… Certo, mo’ (Indica il basso di D. Amalia) nun avessemo visto stu sparpetuo.
Mimì. N’ha pigliato ’a mala salute….. Povero Aniello!
Nunziatina. Comme s’è arredutto! Mare nuie, che simmo!…
Mimì. E starrà peggio assaie. Te’, vide cca, hanno menato pure ’a paglia pe terra, pe nun fa’ sentì ’o rummore d’’e ccarrette.
SCENA VII.
Detti e Concetta.
Concetta. (appare sulla soglia del basso). Bona ge’, che v’avite fatto afferrà?… ’O ssapite ca cca ce sta nu malato, ca s’ha fatto pure ’e sacramente?…
Assunta. Sì, sì, avite ragione… Gnesè, stateve bona…..
Gnesella. Bonasera e salute, Assù. Neh, bonasera a tutte…
D. Vito. Bonanotte! Bonanotte.
Assunta (a Concetta) Comme sta?
Concetta. Chiù ’a llà, ch’ ’a cca.
Assunta. Cuncè, qualunque cosa… senza ceremonie… me putite chiammà.
Concetta. Ve ringrazio, Assù.
Assunta. Dateme ’o permesso… (Rientra in casa).
Concetta. Stateve bona… (Tutti, a poco a poco, escono; meno Taniello e Carmeniello).
Taniello (si avvicina a Concetta). Cuncè.
Concetta. Uh! Taniè, vuie?…
Taniello. Io… Pecchè? Ve surprende?…
Concetta. Aniello s’ha fatto ’e sacramente…
Taniello. ’O ssaccio… Cuncè, crediteme, pe’ quanto è certo Dio, so’ nnucente!…
Concetta. Taniè, cuntatelo a n’ata…
Taniello. Pure vuie?!…
Concetta. Vuie l’avite acciso, a chillo povero giovene!
Taniello. So’ stato io?… E che v’aggia dicere!… Eppure, sentite, ’a tutte quante me putevo aspettà na calunnia; ma ’a vuie no!… Basta: ’o Signore v’’o perdona… Si ve cerco nu favore, mm’’o facite?…
Concetta. E che vulite?… Parlate.
Taniello. Voglio vedè Aniello pe’ l’urdema vota.
Concetta. Sarrate pazzo?!
Carmeniello (all’amico). Che vaie penzanno?… Iammuncenne….
Taniello. No, io ’a cca nun me movo… Io tengo ’a cuscienza netta, pecchè io voglio bene Aniello cchiù ’e nu frate…
Carmeniello (a Cuncetta) Si vulite, ’o putite cuntentà… Che ce sta ’e male?….. Lassate nu mumento ’a porta aperta, e chillo Taniello ’o vede ’a cca fora…. (A Taniello) Va bene, accussì?…
Taniello. ’A cca, sì, ’a cca!… Io me cuntento!…
Concetta (incerta). Ma nun po essere….. Si se n’addona ’a mamma…
Taniello. V’’o giuro: io nun me faccio a vedè.
Carmeniello. Meh, iammo, facitelo cuntento.
Concetta. Vuie che vulite ’a me?… Si fosse pe Aniello, chillo già v’ha perdunato..
Taniello (con gioia) M’ha perdunato?!
Concetta. Sì, sì… E’ Donn’Amalia ca sta ustinata cu vuie e cu Rusella… Ce pazziate a perdere nu figlio giovene giovene?…
Taniello. E chi po dicere ’o cuntrario…
Carmeniello. Iammo, Cuncè, facitelo cuntento.
Concetta. Vuie me cumprumettite…
Carmeniello. Nun avite paura… É custione ’e nu mumento…
Concetta. (risoluta) Embè, allora, subeto subeto; mo lasso ’a porta aperta e vuie ’o vedite.. V’arraccumanno però… (Entra e lascia la porta aperta).
Taniello (va a guardare e indietreggia). Madonna mia!…
Carmeniello. ’E visto mo? e ghiammuncenne!
Taniello. Si me ce putesse menà a ’e piede!…
Carmeniello (lo trattiene). Pe l’accidere cchiù ampresso?
Taniello. (torna a guardare). Se sta muvenno. Dio, comme s’è cagnato!…
Carmeniello. Iammuncenne. Se po’ truvà ’ascì Donn’Amalia…
Taniello (con l’ansia di chi vuole avere il perdono) Aspè, n’atu mumento!…
Carmeniello. Che vuò fa’?… (Lo allontana dal basso. In questo, Cuncetta chiude la porta).
Taniello Ah! Che barbara sciorte!… (Sospirando, si volta per guardare Aniello, ma la porta s’è chiusa). Hanno nchiuso!…
Carmeniello. Facimmece dui’ passe…
SCENA VIII.
Detti e Rusella
Rusella. (avvolta in uno scialle nero, s’incontra con Taniello vicino al Calvario. Riconoscendolo, gli dice:) Tu cca?!…
Taniello. (con dolore) Sì.. so’ venuto pe’ vedè Aniello l’urdema vota…
Rusella. (con spavento) Forse?!…
Taniello. Nun ancora… Ma nun tene manco n’at’ora ’e vita…
Rusella. N’at’ora?!… Dio, e io l’aggio acciso!… Tu cchiù ’e me!… Ah!… Nun truvarraie maie requie pe’ chello ca mm’’e fatto!
Taniello. Tu cu ragione me si’ nemica; ma io nun te voglio male, no… e si so’ stato sincero cu Aniello…
Rusella. E' stato… pecchè ’o vulive bene, ’o ssaccio… e p’’o troppo bene ll’’e acciso!… Pe’ parta mia, nun te dico niente… Dio t’’o perdona ’o mmale ca mm’’e fatto.
Taniello. Aggio tuorto… É giusto! (Tirato dall’amico s’incammina per andar via).
Rusella. Addio, e sperammo ca nun ce ncuntrassemo cchiù…
Taniello (a Carmeniello) Tutte nemice, tutte! (Escono).
SCENA IX.
Rusella sola
Rusella. (si gitta ai piedi del Crocefisso) Giesù Cristo mio, tu ch’’e sufferto tanta maltrattamente ncroce, pe’ nuie, perdona a sta misera peccatrice ca nun è degna manco ’e t’annummenà!… (Dal basso di D. Amalia si sente tossire Aniello. Rusella solleva il capo, si alza e risoluta corre a battere alla porta di Aniello).
SCENA X.
Rusella e D. Amalia.
D. Amalia. (appare sulla soglia del basso, pallida, severa). Te stevo aspettanno.
Rusella. ('con voce di pianto) Aniello?… Pe carità, diciteme comme sta!
D. Amalia. E tiene pure ’o curaggio ’e m’ ’addimannà?
Rusella. Diciteme chello che vulite, ma rispunniteme: comme sta?
D. Amalia. Vattenne! Vattenne, ca nun me fido manco ’e te guardà!
Rusella. Ma ch’aggio fatto, ch’aggio fatto ca me disprezzate ’e chesta manera?…
D. Amalia. Chello ca fanno ’e femmene perdute!…. M’’e ngannato nu figlio, m’è ngannato!…
Rusella. Ngannato, è overo! Che v’aggia risponnere? Vuie site ’a mamma, e io, pe quanto me putesse disculpà, so’ sempe na scellarata nfame a l’uocchie vuoste… Ma però sta scellarata, ll’ha vuluto bene assaie a Aniello: è prova va ne sia ca mo, mentre isso sta murenno, se trova nnanze ’a porta d’’a casa soia.
D. Amalia. Pe le venì a dà l’uoglio santo!…
Rusella. Io?!…. E cu che core ’o putite di, Donn’Amà? E’ peccato murtale! Sultanto chillo Giesù Cristo beneditto, ca p’’e peccate nuoste hanno miso ncroce, po sapè chello ca ce sta cca dinto… (Si tocca il lato del cuore).
D. Amalia. Nun ’o iastemmà! Statte zitta!…
Rusella. ’O iastemmo?… E già! Dicite buono, pecchè io so’ stata ca l’aggia miso ncroce… È ovè, Giesù Crì, so’ stata io ca t’aggio nchiuvato lloco nfaccia?… Si, si, sò stata io, e mm’’o mmereto d’essere trattata accussì!… Ch’aggia fa’? É o destino nfame ca me perseguita!…
D. Amalia. (ironica) Povera nnucente!
Rusella. Nnucente, sì! Fuie n’ommo ca me lusingaie e me ngannaie. E io ’o credette, pecchè, senza mamma e senza pate, ch’avevo ’a fa’?… Vene a di’ ca si, primma ’e ncuntrà stu scellerato, avesse ncuntrato a chill’angelo d’’o figlio vuosto, tutto chello ch’è succiesso nun sarrìa succeduto!…
D. Amalia. Ma tu avive ’a parlà, si ire na bona femmena: tu avive ’a cunfessà tutte cose a figliemo!
Rusella. E ’o potevo, forse?… Quanno po’ sapette ca Taniello aveva apierte l’uocchie a ’o figlio vuosto, me vedette perduta, nun sapeva a chi santo mm’arraccumanna; si cunfessavo, perdevo Aniello; si m’anniavo, iucavo na carta cu ’a speranza ’e vencere… E accussì facette: anniaie tutto.
D. Amalia. Ll’aie ’a chiagnere a lagrime ’e sanghe!…
Rusella. Cchiù ’e chello ch’aggio chiagnuto e sto’ chiagnenno?… Nun credo!… Io so’ nata sfurtunata ’a cuorpo a mammena!
D. Amalia. E te lagne?… Tu si’ stata ’a distruzione d’’a casa mia sana sana!…
Rusella. Io sto’ cca: facitene ’e me chello che vulite; ma nun mm’anniate ’o bene d’’o figlio vuosto, ch’aggio amato cchiù ’e l’uocchie mieie!.. Io l’aggio ’ngannato, è overo; ma è stato pe’ nun ’o perdere…
D. Amalia. T’avive ’a zuffunnà sotto terra p’’o scuorno, e nun t’avive ’a fa’ vede cchiù!…
Rusella. Io speravo…. Io aggio sempe sperato, ’onn’Amà!….
D. Amalia. E tu ’o vulive bene?… Tu?…
Rusella. Sì, l’aggio amato, comme se po amà a Giesù!… E l’ammore d’Aniello m’aveva fatto addeventà n’ata vota comme a primma… V’’o giuro!
D. Amalia. Nun ghiastemmà!… Statte zitta!… Vattenne!
Rusella. Sempe ’a stessa femmena vuie; ma io ch’aggia di’ pe’ ve smovere?… Me vulite fa’ ascì pazza?… (Con preghiera). Donn’Amà, facitelo pe chi tenite mparaviso: perdunateme: so’ na povera sfortunata!
D. Amalia. Ma nun te n’adduone ca io sto’ tremmanno sana sana?… Ah, ca te vulesse sceppà ’o core ’a pietto, te vulesse!…
Rusella. Site senza core, site!
D. Amalia. Senza core, sì! Ma vattene ’a nanze a me, ca si te vedesse morta ’nterra te sputarria ciento vote ’nfaccia!…
Rusella. Facitelo… Dicite chello ca vulite vuie… Se ne sentette tante chillo Cristo beneditto… (Indica il Calvario).
D. Amalia. Vattene, auciello ’e mala nova, ’a nanze a casa mia!… Vattenne!…
Rusella. Me ne vaco; ma primma aggio ’a vedè Aniello… Io so’ venuta cca p’essere perdunata… E vuie me l’avite ’a fa’ vedè!…
D. Amalia. (va incontro a Rusella in atto di minaccia) Vattenne, si nun vuo’ fa’ fa’ nu guaio!… Vattenne, si nun vuo’ na botta ’e curtiello sotto ’o core! (Rusella indietreggia) Nfame! Nfame!
Rusella. (risoluta). Acciditeme, si tenite ’o curaggio… Sì, acciditeme nnanz ’a porta d’’o figlio vuosto…
D. Amalia. (minacciosa) Rusè, nun me tentà!… (Afferra Rusella con la mano armata d’un coltello).
Aniello. (d: d: il basso) Ma’!… Oi’ mà!… (Si ode tossire Aniello).
D. Amalia. (ha ribrezzo di quello che stava per commettere). È isso ca t’ha salvata!… ’O siente?… Tiene ’o coraggio d’aizà l’uocchie sulamente?
Rusella. (abbassa lo sguardo) Dio ve risponne pe me!… (Ricomincia a piovere, tuona e lampeggia in lontananza).
Aniello. (d: d: il basso) Ma’! Ma’!.. (Rusella si slancia per correre nel basso di Aniello. D. Amalia la ferma).
D. Amalia. ’O vuo’ fernì ’e distruggere?…
Rusella. (dà un grido) Aniè!… Core mio!…
Aniello. (d: d: il basso) Rusè!… Rusè!… (La voce si spegne).
Rusella. (con scatto) Accediteme, ma l’aggia vedè pe’ l’urdema vota!…
Aniello. (d: d: il basso) Ma’!… Ma’!…
Rusella. (si sofferma ed escalama:) Ah! Giesù Cri’, Giesù Cristo mio! (Corre al Calvario e cade in ginocchio. D. Amalia si precipita nella casa e ne chiude la porta. Rusella prega. Ad un tratto si ode gridare.)
D. Amalia (d: d: il basso) Figlio! Figlio mio bello!…
Rusella. (s’alza, si precipita alla porta del basso e picchia ripetutamente) Arapite! Arapite!… Donn’Amà!… Aniè!… Aniè!… (Qui la voce è fioca e le forze le vengono meno. Rusella con le braccia protese scivola sulla porta, si piega su se stessa, e resta accasciata, singhiozzando:) Aniè!… Aniè!… (Tace. Il temporale imperversa orribilmente. Le due guardie di P. S. di ronda attraversano la scena).
fine
Napoli, 9. 10. 11. Settembre 1905.