Poesie - Salvatore di Giacomo/III
III.
VOCE LUNTANE.
Fronna d’aruta!…
Stu core mio stracquato e appecundruto
io nun me fido d’’o purtà cchiù mpietto:
ll’aggio atterrato e manco aggio arricietto,
e porto passianno a nu tavuto.
Ah, fronn’ ’e rosa mia, frunnella ’e rosa!
muorto ’e na ventina ’e malatie,
e ogne tanto ’o risusceta quaccosa,
cierti penziere, cierti ffantasie…
Comm’a nu mare ca cuieto pare
e sotto nun se sape che succede,
c’arrassusia nun ce se po’ fa’ fede,
pecché nganna purzì li marenare;
accussì chi me sape e chi me vede
mai putarrà stu core scanagliare,
ca, si lle parlo de lacreme amare,
certo me ride nfaccia e nun me crede.
Nncopp’a lu mare passano, cantanno
d’ammore e gelusia, li rundinelle
quanno a n’ato paese se ne vanno.
— Addio! — strillano tutte sti vucelle,
e lu mare risponne suspiranno,
e se sente nu sbattere de scelle…
Comm’ a nu suonno, dint’a nuttata
d’abbrile, quanno doce è lu durmire,
passa e ve sceta, e ll’anema ncantata
le corre appriesso cu ciento suspire;
accussì tu passaste, e la resata
toia, li prumesse de chist’uocchie nire,
mo ca la passione s è scetata,
de vede mo me pare e de sentire…
Si sapesse addó staie! Cammenarria
tutta la notte e tutta la iurnata,
nfi a lu mumento ca te truvarria.
Chi sa si, quanno t’avesse truvata,
comm’a tanno sta vocca redarria,
sta vocca bella, sta vocca affatata!…
Comm’ a nu lume addò ll’uoglio, mmiscato
cu ll’acqua, lu lucigno fa schiuppare,
ca, guardanno, ve pare e nun ve pare
ca se stufasse, e po’ resta appicciato;
accussì, pe la via c’aggio da fare,
a vote a vote me manca lu sciato,
me fermo, e tremmo… e po’, tutt’affannato,
piglio curaggio e torno a cammenare.
Arrivarraggio? Da na voce affritta
io me sento risponnere: — Chi sa? —
E pe la strata, ca nun è deritta,
io poveriello stento a cammenà…
Che notta scurai E già me so’ sperduto…
Addo vaco?… A chi chiammo?… Aiuto!… Aiuto!…
’E CECATE A CARAVAGGIO.
— DIMME na cosa. T’allicuorde tu
’e quacche faccia ca po’ ’o munno ’e vista,
mo ca pe sempe nun ce vide cchiù?
— Sì, m’allicordo; e tu? — No, frato mio;
io so’ nato cecato. Accussì ncielo,
pe mme murtificà, vulette Dio…
Lassa sta’ Dio!… Quant’io ll’aggio priato,
frato, nun t’ ’o puo’ manco mmaggenà,
e Dio m’ha fatto addeventà cecato.
— È overo ca fa luce pe la via
’o sole?… E comm’è ’o sole? ’O sole è d’oro,
comme ’e capille ’e Sarrafina mia…
— Sarrafìna?… E chi è? Nun vene maie?
Nun te vene a truvà? — Sì… quacche vota…
— E comm’è? Bella assaie? — Sì… bella assaie…—
Chillo ch’era cecato ’a che nascette
suspiraie. Suspiraie pure chill’ ato,
e ’a faccia mmiezz’e mmane annascunnette.
Dicette ’o primmo, doppo a nu mumente:
— Non te lagnà, ca ’e mammema carnale
io saccio ‘a voce… ’a voce sulamente… —
E se stettero zitte. E attuorno a lloro
addurava ’o ciardino, e ncielo ‘o sole
luceva, ’o sole bello, ’o sole d’oro…
’E DENARE ’E LL’ACQUAIUOLO.
’E denare ’e ll’ acquaiuolo
so' cchiù fridde de la neve,
ma la gente vene, veve,
nun ce penza e se ne va.
Una vota sulamente
st’ arta mia benedicette,
e fuie quanno se vevette
nenna mia na giarra ccà.
Puveriello, puveriello !
Mo' nun saccio cchiù addò sta!
Metto ll’acqua, e stu penziero
sbarea sempe e nun m’aiuta :
quanta vote ’int’ ’o bicchiero
quacche lacrema è caduta !
Bona gente, ca vevite
acqua e lacreme mmiscate,
cumpatile, cumpatite,
penzo sempe a chella llà!...
Puveriello, puveriello !
E nun saccio cchiù addò sta !
Chillu soldo ca mme dette,
’o vedite, ’o tengo ccà,
a la giaira addò vevette
cchiù nisciuno vevarrà.
Ma ’e denare ’e ll’acquaiuolo
so' cchiù fridde de la neve,
e la gente vene, veve,
nun ce penza e se ne va...
E io rummano, puveriello,
a penzà chella addò stà!...
LETTERA MALINCONECA.
Luntana staie. Natale sta venenno:
che bello friddo, che belle ghiurnate!…
Friddo o paese tuio nne sta facenno?
Pe Natale ve site priparate?
Luntana staie… No… siente… nun è overo,
t’aggio ditto ’a buscia… Chiove a zeffunno…
mme se stregneno ’o core e lu penziero…
nun ce vurria sta’ cchiù ncopp’a stu munno!
Nun ce vurria sta’ cchiù sulo penzanno
ca fa tant’acqua e nun te sto vicino…
Pe nascere e murì na vota l’anno
che brutto tiempo sceglie stu Bammino!…
Basta, che faie?… Di’… che te dice ’o core?
Aggiu pacienzia… io scrivo e scasso doppe…
nun tengo a capa… Te manno stu sciore,
astipatillo ’int’ ’a stessa anviloppe…
LETTERA AMIROSA.
Ve voglio fa’ na lettera a ll’ingrese,
chiena e tèrmene scívete e cianciuse,
e ll’aggia cumbinà tanto azzeccosa
ca s’ha d’azzeccà mmano pe nu mese.
Dinto ce voglio mettere tre cose,
nu suspiro, na lacrema e na rosa,
e attuorno attuorno, a ll’ammilocca nchiusa,
ce voglio da’ na sissantina ’e vase.
Tanto c’avita di’: "Che bella cosa!
Stu nnamurato mio quanto è priciso!"
Mentr’io mme firmo cu gnostia odirosa:
Il schiavottiello vosto: Andonio Riso.
’E CCERASE.
Abbrile, abbrile! Mmieze ffronne ’e rosa
vaco vennenno ’o frutto ’e chisto mese;
cacciate a capa, femmene cianciose,
io donco ’a voce e vuie facite ’a stesa:
"Frutto nuviello e mese ’e paraviso!
Collera ncuorpo a nuie nun ce ne trase!…"
'E ccerase!… ’E ccerase!…
Ll’anno passato, ’o tiempo d’’e cerase,
facevo ’ammore cu na Purticesa,
abbascio ’o Granatiello steva ’e casa,
e ’a chiammaveno Rosa ’a vrucculosa.
Belli tiempe de lacreme e de vase!…
Ogne lacrema quanto a na cerasa!
Ogni cinche minutele nu vaso!…
'E ccerase!… ’E ccerase!…
Ma caggia fa’? Se so’ cagnate ’e ccose,
e m’ha licenziato, chella ’mpesa!
È arrivato nu legno genuvese,
e ’o capitano ha ditto ca s’’a sposa…
Capitano d’’o legno genuvese,
addò t’’a puorte ’a bella Purticesa?
'E ccerase!… ’E ccerase!…
Cacciate ’a capa, femmene cianciose;
io donco ’a voce e vuie facite ’a stesa:
’E ccerase!… E ccerase!… Abbrile è ’o mese
c’uno se scorda meliune ’e cose…
Capitano d’’o legno genuvese,
a me nun mme ne mporta ca t’’a spuse;
mme daie na voce a n’ato pare ’e mise!
'E ccerase!… ’E ccerase!…
CUNTRORA.
STO menato ncopp’’o lietto,
sto guardanno nnanze a me,
tengo ’o sole de rimpetto,
dinto ’o core tengo a tte!
Sento ’e vvoce d’ ’a cuntrora,
sento ’a gente cammenà,
nu rilorgio sona ll’ora,
nu guaglione chiamma: "Oi ma’!…"
Tu che faie? Forze ’e nucelle
spuzzulie sott’’a perziana,
o fatiche, a tummarelle,
nu merletto a nu volà…
E accussì mme miette ’n croce,
c’ ’o merlette e cu’ ’e nucelle,
e pazzie cu’ ’e tummarelle
comme faie pure cu me…
Ah! putesse io nu mumento
farte chello ca mme faie,
darte ’a smania ca mme sento,
farte chiagnere pe me!
E menato ncopp’’o lietto
guardo, guardo nnanze a me…
Tengo ’o sole de rimpetto…
dint ’o core tengo a te!
’O VICO D’ ’E SUSPIRE.
’A cchiù meglia farenara
sta ’int’ ’o vico ’e Ppaparelle,
addò fanno ’e farenelle
tutte ’e capesucietà.
Comm’ ’a gnostia tene ll’uocchie
e se chiamma ’onna Rusina,
nfarenata ’int’ ’a farina
d’ ’a cchiù fina qualità.
Dint ’o stesso vecariello,
facce fronte ’a farenara,
Peppenella ’a gravunara
guarda ’e giuvene passà.
Chella rire e chesta guarda,
chesta guarda e chella rire,
e ne votteno suspire
tutte ’e capesucietà!…
DONN’AMALIA ’A SPERANZELLA.
DONN’Amalia ’a Speranzella,
quanno frie paste crisciute,
mena ll’oro ’int’’a tiella,
donn’Amalia ’a Speranzella.
Che bellezza chillu naso
ncriccatiello e appuntatieilo,
chella vocca ’e bammeniello,
e chill’ucchie, e chella faccia
mmiez’’e tìttele e ’a vurraccia!
Pe sta femmena cianciosa
io farria qualunque cosa!…
Piscetiello addeventasse,
dint’’o sciore m’avutasse,
m’afferrasse sta manella,
mme menasse ’int’ ’a tiella
donn’Amalia ’a Speranzella!
NCOPP’ ’E CCHIANCHE.
NCOPP’ ’e Chianche, ’int’’a na chianca
aggio visto a na chianchera,
cu nu crespo ’e seta ianca,
cu ciert’uocchie ’e seta nera,
e, da tanno, sto passanno
sulamente p’’a guardà,
ncopp’ ’e Cchianche ’a Carità.
E passanno stammatina
aggio visto c’’o guarzone,
sott’’a porta, ’e pume ’attone
sceriava c’’o limone,
e ’a chianchera steva stesa
mmocc’a porta, e accarezzava…
nu mmalora ’e cane ’e presa!
’O VICO D’ ’E SCUPPETTIERE.
DINT’a lu vico de li Scuppettiere,
addò se fanno scuppette e pistole,
sott’ a n’arco ce sta nu cafettiere,
tene pe figlie tre belle figliole,
dint’ a lu vico de li Scuppettiere.
Si nun me sbaglio, una se chiamma Rosa;
ne va ciento ducate la resella:
quanno mette cafè che bella cosa,
che bella grazia, che bella manella!
Si nun me sbaglio una se chiamma Rosa…
Ll’ata sora se chiamma Nunziata,
se mette sott’a ll’arco e canta a stesa,
passa la gente e ce resta ncantata…
"Che bella voce che tene sta mpesa!"
Ll’ata sora se chiamma Nunziata.
Ma nun pozzo sapé che nomme tene
ll’urdema figlia de lu cafettiere,
chella che mette st’anema a li PPene,
dint’ a lu vico de li Scuppettiere…
Quanto vurria sapé che nomme tene!
Sto piglianno cafè senza sparagno
cinco o se’ vote dinto a la iurnata,
sto perdenno lu suonno e nun me lagno,
sto facenno na vita disperata;
sto piglianno cafè senza sparagno!
Cafettié, cafettié! Figlieta è nfama!
Sapenno certo ca lle voglio bene,
vo’ fa’ vede ca cóse o ca ricama,
core mpietto ne tène o nun ne tene ?…
Cafettié, cafettié! Figlieta è nfama!…
AVITE maie liggiuto quacche cosa
ca, zumpanno, v’ha fatto, llà ppe llà,
nu sciore sicco, na frunnella ’e rosa,
nu mutivo e canzone allicurdà?
D’allicuorde campammo. A poco a poco
cennere fredda avimm’addeventà.
ma sempe sott’’a cennere lu ffuoco
d’ ’e tiempe belle s’annascunnarrà.
Va, libbro, atturniato d’angiulille,
sceta stu ffuoco e nun ’o fa’ stutà;
nu sciore sicco, nu cierro ’e capille
a chi te legge falle allicurdà…